Туркиянинг Синдирги шаҳрида (Баликесир) 6,1 магнитудали зилзила содир бўлди. Бу ҳақда Туркия табиий офатларга қарши кураш бошқармаси (AFAD) хабар берди.
Ер силкиниши 27 октябрь куни соат 22:48 да (Тошкент вақти билан 28 октябрь 00:48 да) юз берган. Зилзила ўчоғи деярли 6 километр чуқурликда бўлган. Табиий офат оқибатида учта бино ва дўкон қулаб тушган.
Туркия президенти Ражаб Тоййиб Эрдўғон зилзила қўшни вилоятларда ҳам сезилганини айтди. Унинг сўзларига кўра, жабрланган ҳудудда аллақачон мутахассислар ишламоқда. Баликесир вилоятида содир бўлган 6,1 магнитудали зилзиладан сўнг 102 та афтершок қайд этилган.
Улардан энг кучлисининг магнитудаси 4,3 ни ташкил этган. Ер силкиниши оқибатида 22 киши жароҳатланган, уларнинг 18 нафарига тиббий ёрдам кўрсатилиб, уйига жавоб берилган.
Эслатиб ўтамиз, 2023 йил февраль ойида Туркияда Рихтер шкаласи бўйича 7,5 баллдан юқори бўлган бир нечта кучли зилзилалар кетма-кет содир бўлди. Табиий офат зонаси 11 та провинция ва қўшни мамлакатларни қамраб олди. Оқибатда 50 мингдан ортиқ киши ҳалок бўлди.
Сейсмологлар таъкидлашича, 2030-йилгача бўлган истиқболда худди шундай кучли зилзила эҳтимоли жуда катта. Бироқ унинг оқибатлари янада ҳалокатли бўлади.
