Ўзбекистонда ўтказилган тезкор тадбирлар давомида иккита уюшган наркожиноий гуруҳнинг 7 нафар аъзоси қўлга олинди. Бу ҳақда Ички ишлар вазирлиги маълумотига таяниб, ЎзА хабар берди.
Маълум қилинишича, трансмиллий жиноий гуруҳ аъзолари қўшни давлатдан гиёҳвандлик воситаларини Тошкент шаҳри орқали Россияга контрабанда йўли билан олиб ўтишни режалаштирган.
Тезкор тадбирлар давомида Тошкент шаҳрининг Янгиҳаёт туманида дала ҳудудига яшириб қўйилган 71 килограммдан ортиқ гиёҳвандлик воситаларини олаётган 4 нафар шахс қўлга олинган. Натижада 355 мингдан ортиқ доза гиёҳвандлик воситаларининг ноқонуний айланишига чек қўйилган.
Шунингдек, Сурхондарё вилояти Денов туманида 8 килограмм гиёҳвандлик воситасини 150 минг долларга сотмоқчи бўлган шахс ушланди. Кейинги тезкор тадбирлар давомида ушбу моддалар занжири аниқланиб, яна икки нафар шахс қўлга олинди. Бу орқали 40 минг доза гиёҳвандлик воситалари тарқалишининг олди олинган.
Бундан ташқари, Андижон шаҳрида кучли таъсир қилувчи дори воситаларининг ноқонуний савдоси билан шуғулланган бир аёл ва икки эркак қўлга олинган. Улардан жами 6,5 минг донага яқин “Тропикамид” ва “Регапен” каби препаратлар аниқланиб, мусодара қилинган.
Мазкур ҳолатлар юзасидан Жиноят кодексининг 273-моддаси билан жиноят ишлари қўзғатилган. Гумонланувчиларга нисбатан тергов ҳаракатлари олиб борилмоқда.
Аввалроқ Афғонистондан Ўзбекистонга кириб келган юк машинасида картошка кўринишида ниқобланган 72 килограммдан ортиқ наркотик модда борлиги аниқлангани ҳақида хабар берилганди.
Дастлабки маълумотларга кўра, ушбу катта миқдордаги гиёҳвандлик воситалари Россия Федерациясига олиб кетилаётган бўлган. Ҳозирда ҳолат юзасидан суриштирув ишлари олиб борилмоқда.
