Кеча, 10 март куни эълон қилинган “Forbes” журнали маълумотларига кўра, АҚШ Президенти Дональд Трампнинг соф бойлиги сўнгги бир йил ичида 1,4 миллиард АҚШ долларига ошди.
Ҳозирда Трампнинг умумий бойлиги 6 миллиард АҚШ долларига баҳоланмоқда. У дунёнинг энг бой одамлари рейтингида 700-ўриндан 645-ўринга кўтарилган.
Қайд этилишича, Трамп бойлигининг сезиларли қисми криптовалюта билан боғлиқ битимлар ҳисобига ошган. Тахминларга кўра, у ўтган йил давомида WLFI крипто токенларини сотишдан қарийб 550 миллион АҚШ доллари даромад олган. Бундан ташқари, у ҳали ҳам WLFI ва TRUMP номли кўплаб крипто токенларига эгалик қилади.
Трампнинг бошқа активлари ҳам қимматлашган. Хусусан, унинг Мар-а-Лагодаги қароргоҳи қиймати бир йил ичида 370 миллион АҚШ долларига ошган. Мутахассислар бу маскан Трампнинг сиёсий фаолиятида муҳим роль ўйнашини таъкидламоқда. У ерда Президент кўплаб хорижий етакчилар билан учрашувлар ўтказади.
Бундан ташқари, Трампга тегишли олтита штатда жойлашган 10 та гольф клуби қиймати ҳам ошиб, бир йил ичида қарийб 200 миллион АҚШ долларига кўпайган.
Таъкидланишича, агар криптовалюталар ва Trump Media & Technology Group акциялари нархи пасаймаганида, Трампнинг бойлиги янада кўпроқ бўлиши мумкин эди.
