Қозоғистонлик шифокор Нью Йоркдан Тошкентга парвоз қилаётган рейсдаги йўловчилардан бирига шошилинч тиббий ёрдам кўрсатди. Бу ҳақда Liter.kz хабар берди.
Ҳодиса самолёт Арктика устидан учиб ўтаётган пайтда юз берган. Ортопед-травматолог Ерсин Жунусов ААОС 2026 халқаро ортопедлар конгрессидан қайтаётган эди. Парвоз бошланганидан тахминан икки ярим соат ўтгач, экипаж самолётда шифокор бўлса ёрдам беришни сўраб эълон берган. Бортда 246 нафар йўловчи бўлиб, улар орасидаги ягона шифокор Ерсин Жунусов эди.
Бортдаги йўловчилардан бирининг аҳволи тўсатдан ёмонлашган. Унда кучли тахикардия ва юқори қон босими — 150/100 мм симоб устуни кузатилган. Бу вақтда самолёт 10 минг метрдан ортиқ баландликка кўтарилган бўлиб, Шимолий қутб орқали ўз йўналишида кетаётган эди.
“Деярли 10 соат давомида унинг аҳволини кузатиб бордим: пулс ва қон босимини назорат қилдик, кислород уладик ҳамда қўнишгача вазиятни барқарорлаштириш учун бошқа йўловчиларнинг дори-дармонларидан фойдаландик.
Бортдаги Wi-Fi орқали остоналик дўстим, профессор-кардиоаритмолог Аян Абдрахманов билан боғландим. Мен самолётда беморнинг ёнида бўлганимда, у маслаҳатлар бериб турди. Шу тариқа икки шифокор бирга ишлади: бири — осмонда, иккинчиси — ерда”, дея ҳикоя қилади Ерсин Жунусов.
Йўловчининг аҳволини барқарорлаштиришга муваффақ бўлинган ва самолёт Тошкентга эсон-омон қўнган. Қўнишдан сўнг самолёт капитани ўн минг метрдан зиёд баландликда кўрсатган ёрдами учун қозоғистонлик шифокорга шахсан миннатдорлик билдирган. Ерсин Жунусов бу воқеа унга шифокорлик касбининг асосий тамойилини яна бир бор ёдга солганини таъкидлади:
“Баъзан шифокорлик касби клиника эшиклари ортида тугамаслигини тушуниб етасан. У доим сен билан бирга — ҳатто ўн минг метр баландликда ҳам”, деди у.
