Ўзбекистон ва Тожикистон дори воситалари ҳамда тиббий ускуналарни биргаликда ишлаб чиқариш имкониятларини кўриб чиқмоқда. Бу ҳақда Тиббиёт ва фармацевтика саноатини ривожлантириш агентлиги матбуот хизмати хабар берди.
Маълум қилинишича, Ўзбекистон—Тожикистон фармацевтика соҳасидаги бизнес форуми доирасида Тиббиёт ва фармацевтика тармоғини ривожлантириш агентлиги директори Абдулла Азизов Тожикистон соғлиқни сақлаш ва аҳолини ижтимоий ҳимоя қилиш вазирининг биринчи ўринбосари Юсуфи Саломуддин бошчилигидаги делегация билан учрашди. Форумда икки мамлакатнинг фармацевтика соҳаси корхоналари иштирок этди.
Тадбир давомида ҳар икки давлат фармацевтика саноатининг бугунги ҳолати, мавжуд имкониятлар ва ҳамкорликнинг истиқболли йўналишлари муҳокама қилинди. Хусусан, ишлаб чиқариш кооперациясини йўлга қўйиш, дори воситалари ва тиббий жиҳозларни маҳаллийлаштириш, экспорт ҳажмини ошириш ҳамда қўшма инвестиция лойиҳаларини амалга ошириш масалаларига алоҳида эътибор қаратилди.
Ўзбекистоннинг маҳаллий фармацевтика ишлаб чиқарувчилари ва Тожикистон компаниялари ўртасида B2B учрашувлар ташкил этилди. Мулоқотларда маҳсулотларни Тожикистон бозорига чиқариш, ўзаро савдо алоқаларини кенгайтириш, технологиялар трансфери ва қўшма ишлаб чиқариш лойиҳаларини амалга ошириш бўйича аниқ таклифлар муҳокама қилинди.
Форум якунида томонлар фармацевтика соҳасида ўзаро манфаатли ҳамкорликни кенгайтириш, ишлаб чиқарувчилар ўртасида тўғридан тўғри алоқаларни ривожлантириш ҳамда истиқболли қўшма лойиҳаларни амалга ошириш бўйича амалий мулоқотларни давом эттиришга келишиб олди.
