Қашқадарё вилояти Қамаши туманидаги Бобуртепа археологик ёдгорлигида олиб борилган қазишмалар давомида қадимий бино қолдиқлари ва унинг ғарбий деворида ишланган ноёб деворий сурат топилди.
Тадқиқотлар чоғида иншоот хоналаридан бирининг ғарбий деворидаги гил сувоқ устида лола ва оқ гуллар тасвири аниқланган. Гуллар қизил рангдаги ингичка тўлқинсимон чизиқлар билан безатилган. Кейинчалик деворий сурат оқ оҳакли сувоқ қатлами билан қопланган.
Бинонинг қалин ва маҳобатли деворлари ҳамда сақланиб қолган безаклари иншоот милодий IV–V асрларда ибодатхона сифатида фаолият юритган бўлиши мумкинлигини кўрсатмоқда. Мутахассислар келгусидаги қазишма ва тадқиқотлар орқали бинонинг асл вазифаси, меъморий тузилиши ва тарихий аҳамиятини аниқлаштиришни режалаштирган.
Археологик тадқиқотлар Самарқанд археология институти ходими Санжар Абдурахимов томонидан олиб борилмоқда.
