Андижон вилояти Қўрғонтепа туманида жойлашган Ногиронлиги бўлган болалар учун “Ғамхўрлик” марказида болаларга нисбатан жисмоний зўравонлик қилингани аниқланди. Бу ҳақда Ижтимоий ҳимоя миллий агентлиги хабар берди.
Маълум қилинишича, ҳолат акс этган видеолар ижтимоий тармоқларда тарқалгач, Ижтимоий ҳимоя миллий агентлиги Андижон вилояти бошқармаси ходимлари томонидан ўрганиш ишлари олиб борилди. Унинг натижаларига кўра, видеода акс этган 6 нафар тарбиячи ва 1 нафар ҳамшира эгаллаб турган лавозимидан озод қилинди ва улар билан тузилган меҳнат шартномалари қонунчиликда белгиланган тартибда бекор қилинди.
Тарбиячи ходимларнинг иш фаолияти етарлича назорат қилмаган масъул ходимларга интизомий чоралар кўрилди. Мазкур ҳудуддаги тиббиёт бирлашмасининг мутахассис ходимларини жалб қилган ҳолда муассасадаги болалар тиббий кўрикдан ўтказилди.
Шунингдек, “Ғамхўрлик” марказидаги болалар учун мўлжалланган ўйин майдонлари атрофига қўшимча назорат камералари жойлаштирилди.
