Россия Украинанинг Киев шаҳрига “тизимли зарбалар”нинг янги тўлқинини амалга ошириш билан таҳдид қилди. Бу ҳақда BBC хабар берди.
Москва зарбалар “қарор қабул қилинадиган марказлар ва қўмондонлик пунктлари”, шунингдек, шаҳардаги дрон ишлаб чиқариш объектларини нишонга олишини билдирган. Россия хорижий фуқаролар ва дипломатларни Киевни “иложи борича тезроқ тарк этишга” чақириб, фуқароларга маъмурий ва ҳарбий бинолардан узоқ юришни тавсия қилган.
Украина томони эса Россиянинг бу таҳдидларини “уятсиз шантаж” деб атаб, Ғарб иттифоқчиларини Москвaга босимни кучайтиришга чақирган.
Украина расмийларига кўра, Россия Киевни деярли ҳар ҳафта зарбалар остида қолдириб келмоқда ва хавфсизлик таҳдиди ҳали ҳам юқори даражада сақланиб қолган.
Жорий йилнинг 23 май куни кечаси амалга оширилган йирик ҳужумларда Киев ва бошқа ҳудудларда 4 киши ҳалок бўлган, 100 га яқин одам жароҳат олган. Украина Президенти Владимир Зеленский бу ҳақда маълум қилган.
Москва эса бу зарбаларни Украинанинг Старобельскдаги талабалар ётоқхонасига уюштирилган ҳужумга жавоб деб атаган ва у ерда 21 киши ҳалок бўлганини билдирган. Украина армияси эса бу айбловни рад этиб, ўз кучлари фақат Россия ҳарбий дрон бўлинмаларини нишонга олганини айтган.
Россия Киевга қарши уруш бошланганидан буён деярли ҳар ҳафта йирик ракета ва дрон ҳужумларини амалга ошириб келмоқда. Сўнгги йилларда эса айрим йирик зарбаларда 24 нафаригача одам ҳалок бўлган ҳолатлар қайд этилган. Яқинда Киев яна энг йирик ҳаво ҳужумларидан бирини бошдан кечирди, унда юзлаб дрон ва ракеталар ишлатилган.
Россия Ташқи ишлар вазири Сергей Лавров АҚШ Давлат котиби Марко Рубио билан телефон суҳбатида америкалик дипломатларни Киевдан олиб чиқишни тавсия қилган. Рубио эса бундай йирик ҳужумлар урушни тўхтатиш зарурлигини яна бир бор эслатишини айтган.
