Шимолий Корея етакчиси Ким Чен Инга АҚШга етиб бора оладиган қитъалараро баллистик ракета намойиш қилинди. Бу ҳақда Reuters хабар берди.
Баллистик қурол Кимнинг мудофаа саноати музейига ташрифида тақдим этилган. Бу янгилик АҚШ президенти Дональд Трампнинг Осиёга режалаштирилган сафари чоғида Ким билан учрашиши мумкинлигини айтганидан бир кун ўтиб эълон қилинди. Трамп ноябрь ойи ўрталарида Хитойда бўлиб ўтадиган Осиё-Тинч океани иқтисодий ҳамкорлик саммитида иштирок этиши кутилмоқда.
Таъкидланишича, Ким Чен Ин 11 октябрь куни қизи Жу Аэ ва рафиқаси Ри Сол Жу билан бирга Мудофаа инқилоби музейининг очилиш маросимида қатнашган. Музейда дронлардан тортиб “Хвасонг-20” қитъалараро баллистик ракетасигача бўлган қуроллар намойиш этилган.
Корея мудофаа ва хавфсизлик форуми бош котиби Шин Жонг Вунинг айтишича, “Хвасон-20” ракетаси қурилмаси олдидаги кўргазмада бир нечта жанговар каллакка эга ракета тасвирланган. Шунингдек, харитада ракета етиб бориши мумкин бўлган ҳудудлар кўрсатилган. Улар АҚШ материгидан ташқари Яқин Шарқ, Австралия ва Жанубий Американи ҳам қамраб олади.
“Кўргазма Ким бошчилигида мудофаани ривожлантириш дастурининг ютуқларини намойиш этишга мўлжалланган. Бу Шимолий Корея—АҚШ саммити олдидан стратегик устунликка эришишга қаратилган тарғибот таассуротини қолдиради”, деди Шин.
Таҳлилчиларнинг айтишича, музей Ким Чен Иннинг Шимолий Корея қуролларини мамлакат ҳарбий ютуқларининг доимий рамзларига айлантиришга қаратилган кенгроқ саъй-ҳаракатларини ҳам акс эттиради.
“Қурол-яроғ кўргазмаларини музейга айлантириш орқали Ким ўзининг ҳарбий ютуқларини мустаҳкамламоқда, Шимолий Кореянинг ядро ҳамда ракета дастурини барқарор мерос сифатида кўрсатмоқда”, деди Кюнгнам университетининг Узоқ Шарқ тадқиқотлари институти профессори Лим Эул-чул.
Шунингдек, Шимолий Корея 12 октябрь куни тактик баллистик ракетани синов тариқасида учирганини маълум қилди. Синовнинг мақсади ракетанинг муҳим таркибий қисмларидан бири техник жиҳатдан такомиллаштирилгани муваффақиятли амалга оширилганини текшириш бўлган. KCNA қўшимча тафсилотларни келтирмасдан, янгиланиш барча ҳужумкор қурол тизимларининг ишлашини яхшилашда муҳим қадам эканини хабар қилди.
