АҚШ мустақиллигининг 250 йиллиги муносабати билан мамлакатда амалдаги президент Дональд Трамп тасвири туширилган паспортлар серияси чиқарилади. Бу ҳақда “Time” хабар берди.
Эълон қилинган янги дизайнга кўра, паспорт муқовасининг ички олд томонида Трампнинг портрети ва унинг олтин рангда ёзилган имзоси бўлади. Орқа томонида эса, америкалик рассом Жон Трамбуллнинг машҳур “Мустақиллик декларацияси” картинасидан бир қисми тасвирланади.
Маълумотларга кўра, бундай паспортлар одатда Вашингтондаги паспорт агентлиги томонидан берилади. Аммо паспортни онлайн ёки бошқа ҳудудлардан расмийлаштирган фуқаролар одатий дизайндаги ҳужжатни олади.
Янги кўринишдаги бундай паспортлар қанча миқдорда чиқарилиши ҳозирча аниқ эмас.
Ҳозирги (стандарт) паспорт дизайнида эса, муқованинг ички томонида бошқа рассом — Эдвард Перси Моран асари жойлаштирилган. Унда АҚШ мадҳияси матнининг муаллифи Фрэнсис Скотт Кей тасвирланган бўлиб, у Форт МакГенри қалъаси бомбардимон қилинганидан кейинги ҳолатда акс этган. Айнан шу воқеа Кейни машҳур мадҳияни ёзишга илҳомлантирган.
Бундан ташқари, жорий йилнинг 26 март куни яна бир янгилик эълон қилинган эди: мустақилликнинг 250 йиллиги муносабати билан чиқариладиган 100 долларлик купюраларда ҳам амалдаги президентнинг имзоси жой олади. Бу сўнгги 165 йил ичида биринчи марта президент имзоси ғазначи имзосининг ўрнини эгаллаши бўлади.
Яна бир муҳим жиҳати, АҚШ Тасвирий санъатлар комиссияси ушбу юбилей муносабати билан 24 каратли олтин танга чиқаришни ҳам маъқуллаган. Унда президент стол ортида муштларини қисган ҳолда тасвирланади ва “Liberty” (“Эркинлик”) ёзуви туширилади.
Қайд этилишича, 2025 йил октябрь ойида Трамп маъмурияти ушбу комиссия аъзоларини алмаштириб, уларнинг ўрнига Оқ уй сиёсатига яқин бўлган шахсларни тайинлаган.
