“Толибон” матбуот котиби Забиҳулла Мужоҳид АҚШ дронлари ҳамон Афғонистон ҳаво ҳудудида айланиб юрганини маълум қилди. Бу ҳақда Afghanistan International хабар берди.
Мужоҳидга кўра, “Толибон” ҳокимиятга қайтганидан бери АҚШ дронлари айрим қўшни давлатлар ҳудудидан учиб кириб, Афғонистон ҳаво ҳудудуини бузиб келмоқда. Эрон давлат радиосига берган интервьюсида Мужоҳид бу ҳаракатлар дарҳол тўхтатилиши кераклигини айтган.
“Биз бу парвозларнинг имкон қадар тезроқ тўхтатилишини талаб қиламиз. Бу Афғонистон ҳаво ҳудудининг бузилиши ва бунга йўл қўйиб бўлмайди”, деган у.
“Толибон” расмийсининг айтишича, улар мавжуд халқаро учрашувларда бу масалада норозилик билдирган ва бу ҳаракатлар тўхтатилишини талаб қилган. Аммо дронлар қайси қўшни давлат ҳудудидан кираётгани ҳақида у аниқ маълумот бермаган. Мужоҳид ушбу баёнотидан олдин АҚШ дронларининг Афғонистонга киришида Покистон ёрдам бераётгани даъво қилган эди.
АҚШ билан муносабатлар ва Бағрам масаласи
Мужоҳидга кўра, “Толибон” ҳозир балансли ва иқтисодга йўналтирилган сиёсат юритиб, барча давлатлар билан, жумладан АҚШ билан ҳам, муносабатларни йўлга қўймоқчи.
“Асосий шарт — Афғонистонга ҳурмат”, деган у.
Америка қўшинлари қайтиб келиши ва Бағрам ҳарбий базасига жойлаштирилиши мумкинми, деган саволга эса у кескин жавоб берди:
“Биз ҳеч қачон Афғонистон тупроғининг ҳатто бир қаричини ҳам чет эл қўшинлари назоратига бермаймиз. Битта ҳам хорижий аскарнинг Афғонистонда бўлишига рухсат бермаймиз”, деган у.
У, шунингдек, Баграм базасида Хитой ҳарбийлари борлиги ҳақидаги хабарларга ҳам муносабат билдирган:
“На америкаликлар, на хитойликлар Бағрамга келган. Биз ҳеч бир давлатнинг ҳарбий кучларига бу ерда база очишга рухсат бермаймиз. Бунга халқ ҳам, ҳукумат ҳам рози эмас”.
