20 декабрь, шанба куни АҚШ, Миср, Қатар ва Туркия вакиллари Маями шаҳрига йиғилиб, Ғазодаги тинчлик келишувининг биринчи фазаси ижросини баҳолашди. Шундан сўнг битимнинг иккинчи босқичга тайёргарлик жараёни юзасидан муҳокамалар бошланди. Бу ҳақда АҚШ президентининг махсус вакили Стив Уиткофф X (собиқ Twitter) ижтимоий тармоғида маълум қилди.
Унинг сўзларига кўра, сулҳнинг биринчи босқичи доирасида гуманитар ёрдам ҳажми кенгайиб, гаровга олинган исроилликлар ҳамда жасадлар қайтарилган. Бундан ташқари, Исроил анклавдан ўз қўшинларини қисман олиб чиқишига эришилган.
Уиткоффнинг айтишича, иккинчи босқич бўйича музокараларда томонлар Ғазода тинч аҳолини ҳимоя қилиш ва жамоат тартибини сақлаш учун ягона бошқарув органини шакллантириш зарурлигини таъкидлаган. Бундан ташқари, кун тартибидан минтақавий интеграция масалалари ҳам ўрин олган.
Савдо тартиб-таомилларини соддалаштириш, инфратузилмани ривожлантириш, энергетика, сув таъминоти ва бошқа умумий ресурслар бўйича ҳамкорлик шулар жумласидан. У, шунингдек, кафил томонлар кенг қамровли тинчлик режасини босқичма-босқич амалга ошириш масаласини кўриб чиққанини таъкидлаган. Уиткоффга кўра, жараён маҳаллий институтлар ва халқаро ҳамкорлар билан ҳамкорликда олиб борилиши лозим.
“Биз президент Трампнинг 20 банддан иборат тинчлик режасига тўлиқ содиқлигимизни яна бир бор тасдиқлаймиз. Барча томонларни ўз мажбуриятларига амал қилишга, вазминлик кўрсатишга ҳамда мониторинг механизмлари билан ҳамкорлик қилишга чақирамиз”, деди АҚШ махсус вакили.
Уиткофф сулҳнинг иккинчи босқичини амалга ошириш бўйича маслаҳатлашувлар бир неча ҳафта давом этишини маълум қилди. Бироқ АҚШ келишувнинг навбатдаги фазасини муҳокама қилиш учун кафил томонларни жамлаган бир вақтда, Исроил Ғазонинг Туффаҳ маҳалласида жойлашган мактаб биносига зарба берди. Натижада тўй маросими учун йиғилган 6 нафар фаластинлик ҳалок бўлди.
