Қозоғистонда икки сутка ичида мамлакатдан ёнилғи олиб чиқиб кетишга бўлган 60 дан ортиқ уринишнинг олди олинди. Бу ҳақда Қозоғистон Республикаси ҳукумати маълум қилди.
Молия вазири ўринбосари Ержан Бижанов ёнилғи бозоридаги вазиятга бағишланган ҳукумат йиғилишида сўнгги икки сутка ичида Қозоғистон чегарасида республикадан ёнилғи-мойлаш материалларини (ЁММ) олиб чиқиб кетишга бўлган 61 та уринишнинг олди олингани ҳақида ахборот берди. Хусусан, қўшимча баклар ва канистраларда жами 3 тоннадан ортиқ ёқилғи аниқланган.
Унинг сўзларига кўра, мобиль гуруҳлар чегараолди трассаларида тун-у кун патруллик қилмоқда ҳамда бензин ташувчи ва автоцистерналарни текширмоқда. Шунингдек, давлат даромадлари органлари 62 та автоёнилғи қуйиш шохобчаси ва 22 та кичик нефтни қайта ишлаш заводи фаолиятини текшириб, уларда хизмат кўрсатиш ҳажмининг аномал даражада ўсишини аниқлаган.
Ички ишлар вазири Ержан Саденовнинг маълум қилишича, йил бошидан буён умумий ҳажми 40 минг литрдан ортиқ бўлган нефть маҳсулотларини ноқонуний олиб чиқиб кетишга бўлган 593 та уриниш бартараф этилган.
Ҳозирги вақтда Қозоғистонда бензин, дизель ёнилғиси ва яна бир қатор нефть маҳсулотларини автомобиль ҳамда темир йўл транспорти орқали хорижга олиб чиқиб кетишга тақиқ амал қилмоқда ва ушбу тақиқни яна ярим йилга узайтириш режалаштирилган.
