Ўзбекистон билан Сербия ўртасидаги олий даражадаги музокаралар якунида Кўксарой қароргоҳида дарахт экиш маросими бўлди. Бу ҳақда Президент матбуот хизмати хабар берди.
Фахрий меҳмонлар хиёбонида президентлар Шавкат Мирзиёев ва Александр Вучич мамлакатлар ва халқлар ўртасидаги дўстлик ҳамда шериклик муносабатларини мустаҳкамлашга, икки томонлама муносабатлар тарихида янги саҳифа очишга интилиш ифодаси сифатида дарахт экди.
Сербия президенти ташрифига доир хабарлар
Кўксарой қароргоҳида мамлакатга расмий ташриф билан келган Сербия президенти Александр Вучични расмий кутиб олиш маросими ўтказилди. Биргаликда суратга тушилгандан сўнг давлат раҳбарларининг делегациялар иштирокидаги музокаралари бошланди.
Шавкат Мирзиёев ва Сербия президенти Александр Вучичнинг расмий делегациялар иштирокидаги музокаралари бўлиб ўтди. Ҳамкорликнинг иқтисодий кун тартибини илгари суриш мақсадида келгуси йилда Тошкент шаҳрида Ҳукуматлараро комиссиянинг биринчи йиғилишини ўтказишга келишиб олинди.
Музокаралар якунида Шавкат Мирзиёев ва Сербия президенти Александр Вучич Қўшма декларацияни имзолади.Етакчилар ҳузурида ҳукуматлараро ва идоралараро ҳужжатлар тўпламини қабул қилиш маросими ҳам бўлиб ўтди. Жумладан:
- Инвестицияларни ўзаро рағбатлантириш ва ҳимоя қилиш тўғрисида битим;
- Иқтисодий ҳамкорлик тўғрисида битим;
- Тиббий хизматлар соҳасидаги ҳамкорлик тўғрисида битим;
- Туризм соҳасидаги ҳамкорлик тўғрисида битим;
- Таълим, фан ва маданият соҳаларидаги ҳамкорлик тўғрисида битим;
- Муҳандислик, илғор технологиялар, сунъий интеллект ва турдош соҳалардаги ҳамкорлик тўғрисида битим;
- Дипломатик кадрлар тайёрлаш соҳасидаги ҳамкорлик тўғрисида баённома;
- Ташқи ишлар вазирликлари ўртасидаги ҳамкорлик бўйича 2026-2027-йилларга мўлжалланган дастур;
- Меҳнат миграцияси соҳасидаги ҳамкорлик тўғрисида меморандум;
- Спорт ва жисмоний тарбия соҳасидаги ҳамкорлик тўғрисида баённома;
- Тошкент ва Белград шаҳарлари ўртасида шериклик муносабатларини ўрнатиш тўғрисида битим.
