Андижон вилояти божхона бошқармаси тезкор тузилмалари томонидан Давлат хавфсизлик хизмати ва Ички ишлар идоралари билан ҳамкорликда ўтказилган тезкор тадбирда олдиндан кузатувга олинган шахс гиёҳвандлик воситаларини сотишга уринган вақтида тўхтатиб қолинди. Бу ҳақда Божхона қўмитаси матбуот котиби Ҳусан Тангриев хабар берди.
Пахтаобод туманида ўтказилган тезкор тадбирда фуқаролардан бири ўзи истиқомат қилаётган хонадон олдида 1 дона полиэтилен ўрамдаги гиёҳвандлик воситасини 5 минг АҚШ долларига сотаётган вақтида тўхтатиб қолинган.
Мазкур ўрам белгиланган тартибда ва холислар иштирокида очиб кўрилганида, унинг ичидаги модда салкам 400 грамм “гашиш” гиёҳвандилк воситаси эканлиги маълум бўлган.
Андижон вилояти божхона бошқармаси Контрабандага қарши курашиш бўлимининг ҳуқуқни муҳофаза қилувчи бошқа идоралар билан ҳамкорликда Хонобод шаҳрида ўтказилган тезкор тадбирида ҳам гиёҳвандлик воситалари ноқонуний айланмасининг олди олинган.
Тезкор тадбирда олдиндан кузатувга олинган шахснинг дастлаб ёнида ва автотранспорт воситасида 8 та бўлакда салкам 33 грамм “гашиш” гиёҳвандлик моддаси ва бир дона электрон тарози борлиги аниқланган.
Шундан сўнг, тадбир давом эттирилиб, унинг яшаш хонадони кўздан кечирилганда, 1,12 гр “гашиш” ҳамда 42,64 гр “марихуана” гиёҳвандлик моддалари сақаланаётгани аниқланган.
Хабарда билдирилишича, ҳозирда ҳар иккала ҳолат юзасидан божхона текширувлари давом эттирилмоқда.
