2026 йил 1 сентябрдан Apple компаниясининг янги бош директори этиб Жон Тернус тайинланади. Бу ҳақда компания 21 апрелга ўтар кечаси эълон қилган пресс-релизда маълум қилинди.
2011 йилдан буён компанияни бошқариб келган Тим Кук эса директорлар кенгаши раиси лавозимини эгаллайди.
Маълумотларга кўра, 50 ёшли Жон Тернус 2001 йилдан бери Apple’да ишлайди ва ҳозирда компаниянинг аппарат таъминоти бўйича вице-президенти ҳисобланади.
“Reuters” хабарига кўра, у сўнгги йилларда бозордаги улуши ошган Мас компьютерлари савдосини тиклашда муҳим роль ўйнаган. Аввалроқ “Bloomberg” ҳам Тернус Тим Кукнинг эҳтимолий вориси сифатида кўрилаётганини ёзган эди.
65 ёшли Тим Кук компанияни 15 йил давомида бошқарган ва шу даврда Apple Watch, AirPods, Apple Vision Pro каби маҳсулотлар, шунингдек iCloud, Apple Pay, Apple TV ва Apple Music хизматлари ишга туширилган. Шу вақт ичида компания акциялари қиймати 20 баробарга ошгани қайд этилади.
Компания баёнотига кўра, Тим Кук давлат билан алоқаларни ҳам давом эттиради. Хусусан, у АҚШ Президенти Дональд Трамп билан Apple ўртасидаги ҳамкорлик учун масъул бўлиб қолади.
