iPhone савдоси 2025 йилнинг сўнгги уч ойида тарихий рекорд даражага етди. Янги iPhone 17 серияси туфайли сотувлар кескин ошди. Бу ҳақда Apple компанияси ҳисоботига таяниб BBC хабар берди.
Компания даромади 16 фоизга ошиб, 144 миллиард долларни ташкил этди. Бу 2021 йилдан бери қайд этилган энг юқори ўсиш бўлди. Бунга Хитой, Европа, Америка ва Япония бозорларида савдонинг кескин ортгани таъсир кўрсатди. Бироқ Apple’нинг бошқа маҳсулотлари савдосида пасайиш кузатилди.
Хусусан, Apple Watch ва AirPods каби қурилмаларни ўз ичига олган аксессуарлар савдоси қарийб 3 фоизга, Маc компьютерлари эса 7 фоиздан сал кўпроққа камайди. Apple бош директори Тим Кукнинг сўзларига кўра, iPhone савдосининг кескин ошиши компания “таъминот ортидан қувиш режимида” эканини англатади.
“Ҳозирда мижозларнинг жуда юқори даражадаги талабини қондиришда чекланганмиз. iPhone 17 га бўлган талаб биз кутганимиздан ҳам ошиб кетди”, деди Кук молиявий таҳлилчилар билан суҳбатда.
У Ҳиндистондаги сотувлар минтақа учун чораклик рекорд ўрнатганини маълум қилди. Кук Google билан бўлажак ҳамкорлик ҳақида батафсил маълумот беришдан бош тортди. Ушбу келишувга кўра, Google’нинг Gemini сунъий интеллекти Apple’нинг келажакдаги СИ моделларига ва Siri функцияларини янгилашга асос бўлади.
“Инвесторларни Apple’нинг келгусидаги сунъий интеллект режалари қизиқтирмоқда. Чунки компания бу борада бошқа технологик гигантларга қараганда қолоқ”, дейди Aubrey инвестиция фирмасининг менежери Анна Макдоналд.
У Apple маҳсулотлари, ҳатто улар қадоқланишигача “ёқимли ва мукаммал тажриба” бериши кераклигини айтди. Шунингдек, ҳозирда ChatGPT жавобларидаги айрим хатолар сабабли эҳтимол, Apple сунъий интеллект борасида қарор чиқаришда эҳтиёткорлигини таъкидлади.
Apple келгуси молиявий йилда дўконлар ва инфратузилмани ривожлантиришни ўз ичига олган лойиҳалар учун 16 миллиард доллар сарфлашни режалаштирмоқда. Таққослаш учун, Microsoft сўнгги чоракнинг ўзида, асосан СИ лойиҳаларга, 37 миллиард доллардан ортиқ маблағ йўналтирган. Шу боис Apple’нинг харажатлари нисбатан кам ҳисобланади.
Wall Street инвесторлари Microsoft даромади сезиларли ўсмаган ҳолда сунъий интеллектга катта маблағ сарфлаётганидан хавотирда. Apple чораклик ҳисоботини эълон қилганидан кейин Microsoft акциялари 29 январь кунги савдолар давомида 10 фоизга тушиб кетди. Бу 2020 йилдан бери энг катта бир кунлик пасайиш бўлди.
