Жиноят ишини юритиш чоғида қамоқда ушлаб турилган шахсларни дам олиш ва ишланмайдиган байрам кунларида ҳам қўшимча равишда кийим-бош ва пойабзал билан таъминлаш таклиф этилмоқда. Тегишли қонун ҳужжати Олий Мажлис Қонунчилик палатасининг 18 ноябрь куни бўлиб ўтган навбатдаги мажлисида муҳокама қилинди.
Амалда, эҳтиёт чораси сифатида ушлаб турилганларнинг кийимлари ва озиқ-овқати яқин қариндошлари томонидан олиб келинади.
ИИВ Жазони ижро этиш департаменти бошқарма бошлиғи Баҳром Мадиёровнинг сўзларига кўра, “Жиноят ишини юритиш чоғида қамоқда сақлаш тўғрисидаги Ўзбекистон Республикаси Қонунига қўшимчалар киритиш тўғрисида”ги қонуни билан киритилаётган янги норма ҳибсда ушлаб турилганларнинг ҳуқуқини чекламайди.
Ҳозирги амалиётда ҳам агар уйдагилари унинг кийим-бошини, пойабзалини, озиқ-овқати билан биргаликда олиб келадиган бўлса, қабул қиламиз. Унда муаммо йўқ. Бу фақат рағбатлантирувчи норма сифатида эътироф этиляпти. Кўпчиликда, масалан, шундай ҳолатлар бўладики, уйдагилари хабар топади-да, унинг кийимини олиб келишга имконияти мавжуд бўлмай қолади. Кимдадир қандайдир шароит бўлиб қолади-да, озиқ-овқатини кейин бераман, лекин дастлаб ҳозирги кунда кийимини бериб туринг, деган мазмунда. Шу мазмунда келса ҳам, биз бемалол уни олиб қўяверамиз, ҳеч қанақа муаммо бўлмайди. Яъни буни қонуний жиҳатдан ҳуқуқини таъминлаб қўйиш мақсадида бу норма киритиляпти, деди ИИВ масъул ходим.
Ҳозирда тергов ҳибсхонасида сақланаётган шахслар ИИВ буйруғига мувофиқ ҳар ойда энг кам иш ҳақининг 50 фоизигача (635 минг 500 сўм) озиқ-овқат ва биринчи навбатдаги эҳтиёж молларига сарфлай олади. Лойиҳада бу миқдорни 100 фоизга — 1 миллион 271 минг сўмгача ошириш таклиф қилинган. Баҳром Мадиёровнинг айтишича, сумманинг оширилиши тергов ҳибсхонасида сақланаётган шахслар мурожаати асосида қабул қилинган.
Чунки уларнинг ўз уйдагилари томонидан берилган пул маблағлари етарли миқдорда эмас. Бундан ташқари, уларнинг яқинларини овора қилмаслик ҳам ҳисобга олинди. Яъни фуқаролар узоқ жойлардан келиб, “посилка”, бандерол ёки йўқлов топшириб кетиш ҳолатлари жуда кўпайиб кетяпти. Битта мисол айтадиган бўлсак, Марказий тергов ҳибсхонасида ҳозир 4 мингдан ортиқ шахс сақланаётган бўлса, кунига 250-300 нафар фуқаро келиб, бандерол бериб кетяпти. Фуқароларимизда ортиқча оворагарчилик пайдо бўляпти. Агар фуқаро уйдан чиқмаган ҳолда ҳисоб рақамига пулни ўтказиб қўядиган бўлса, сақланаётган шахс ўзининг керакли, зарур бўлган маҳсулотларни харид қилиш имкониятига эга бўлади. Яъни яқинлари оворагарчилигининг олди олинади, деган мақсадда шу миқдорда белгилаб қўйдик, деди Баҳром Мадиёров.
Мажлисда қонунчилик таклифи депутатлар томонидан маъқулланди ва тегишли қарор қабул қилинди.
