Финляндия Россия билан чегарадаги 200 километрлик тўсиқ қурилишини якунлади. Бу ҳақда YLЕ News хабар берди.
Чегара инфратузилмаси металл тўсиқ, унга туташ йўл ҳамда дарахтлардан ҳоли ҳудудни ўз ичига олади. Тўсиқнинг ўзига кузатув камералари, ёритгичлар ва радио карнайлар ўрнатилган. Қурилиш Финляндияга 356 миллион еврога тушган, унга хизмат кўрсатиш харажатлари эса йилига 1,5 миллион еврони ташкил этиши кутилмоқда.
Тўсиқ мамлакатнинг 17 та муниципалитети ҳудудидан — Лапландиядан тортиб Фин кўрфази соҳилларигача чўзилган. У тахминан минг нафар ер эгасининг ҳудудидан ўтказилган, давлат уларга умумий ҳисобда 3 миллион еврога яқин компенсация тўлаган.
Ушбу тўсиқ чегаранинг ноқонуний кесиб ўтилишига йўл қўймаслик мақсадида қурилган. Қурилиш бўйича дастлабки таклифлар 2022 йилнинг кузида — Россия президенти Владимир Путин сафарбарлик эълон қилгач, атиги бир кунда Евроиттифоқ ҳудудига деярли 17 минг россиялик кириб келганидан сўнг муҳокама қилина бошланганди. Қурилишнинг ўзига эса 2023 йил баҳорида старт берилган.
Россия-Финляндия чегарасининг умумий узунлиги тахминан 1300 километрни ташкил этади. Параллел равишда НАТОнинг бошқа давлатлари ҳам ўз чегараларини мустаҳкамлашга киришган. Хусусан, Болтиқбўйи мамлакатлари Россия ҳамда Беларусь билан чегаралар бўйлаб танкга қарши тўсиқлар, хандақлар, бункерлар ва бошқа мудофаа иншоотлари қуришни ўз ичига олган Балтиc Defence Line тизимини шакллантирмоқда.
