Россия Давлат думаси чет эллик ишчилар учун мажбурий тиббий суғурта полисини бериш қоидаларини қаттиқлаштирадиган қонунни маъқуллади. Ҳужжатга кўра, МТС полисини олиш учун Россия ҳудудида беш йиллик суғурта стажига эга бўлиш талаб этилади. Бу ҳақда Давлат думаси матбуот хизмати хабар берди.
Давлат думаси раиси Вячеслав Володин бепул тиббий ёрдам фақат Россияда камида беш йил қонуний ишлаган муҳожирларга кўрсатилишини таъкидлаган. У бу қоида фақат фавқулодда вазиятларда истисно қилинишини билдирган.
“Мамлакатимизга ишлаш учун келган ва юқори стандартдаги ижтимоий кафолатлардан фойдаланишни истаган шахслар бунга ҳалол ва қонуний меҳнат билан ўз ҳуқуқларини тасдиқлашлари лозим”, деди у.
МТС полиси давлат ижтимоий дастури доирасида бепул тиббий ёрдам олиш ҳуқуқини тасдиқловчи ҳужжат ҳисобланади. Ҳозирги кунда бундай ҳужжатни расмийлаштириш учун Россияда уч йиллик иш стажи талаб этилади.
Қонун лойиҳасига тушунтириш хатида кўрсатилишича, Россияда вақтинча яшаб ва ишлаб турган чет эл фуқаролари ҳамда фуқаролиги бўлмаган шахслар учун беш йиллик иш стажи мажбурий бўлади.
Юқори малакали мутахассисларга бу қоида татбиқ этилмайди. Улар амалдаги нормалар асосида МТС полисини расмийлаштириш ҳуқуқини сақлаб қолади. Шунингдек, Жаҳон савдо ташкилотига аъзо мамлакатлар компанияларининг филиаллари, ваколатхоналари ва шўба корхоналарига юборилган чет элликлар учун ҳам имтиёзлар сақланиб қолади.
Қонун Россия президенти томонидан имзолангандан сўнг кучга киради.
Бундан аввал Россия президенти Владимир Путин 2026–2030 йилларга мўлжалланган давлат миграция сиёсатининг янги концепциясини тасдиқлаганди. Унга кўра, Россияга ишлаш учун келаётган муҳожирлар сонининг ўсиши 2030 йилгача сақланиб қолади. Бу чет эллик ишчиларга бўлган эҳтиёж билан боғлиқ. Янги концепцияда миграция сиёсатининг мақсади, вазифалари ва йўналишлари белгиланган.
