Tamash Sulyok мамлакатнинг янги бош вазири Peter Magyar талаб қилганидек истеъфога чиқишдан бош тортди.
Венгрия президентининг маълум қилишича, бош вазир унинг истеъфосини талаб қилиш учун ҳеч қандай қонуний ёки конституциявий асосга эга эмас. Бу ҳақда Шуйок маҳаллий Index.hu нашрига берган интервьюсида айтган.
“Мен қасамёдимга содиқ қоламан ва вазифаларимни бажариш имкони бўлмай қолмагунча, менга ишониб топширилган ваколатларни бажаришда давом этаман”, — деган у.
Шуйокнинг қўшимча қилишича, қасамёд фақат кўпчилик ёки озчиликни эмас, балки бутун сиёсий миллатни бирлаштиради.
Маълумотларга кўра, 21 апрель куни Tisza партияси етакчиси Петер Мадьяр президент Шуйок ҳамда аввалги ҳукумат даврида тайинланган бошқа амалдорларга ультиматум қўйган. У агар улар 31 майга қадар истеъфога чиқмаса, мажбурий равишда лавозимидан четлаштирилишини билдирган.
Ультиматум остида Куриа (Олий суд) президенти, Миллий суд ҳокимияти раҳбари, Конституциявий суд раиси ва Бош прокурор ҳам борлиги айтилган.
9 май куни Петер Мадьяр расман Венгрия Бош вазири этиб тасдиқланган. Парламентнинг 140 нафар аъзоси уни қўллаб-қувватлаган, 54 нафар депутат қарши овоз берган ва бир нафар депутат бетараф қолган.
Шунингдек, Tisza партияси 12 апрель куни бўлиб ўтган парламент сайловларида ғалаба қозониб, 199 ўриндан 141 тасини қўлга киритгани ва конституциявий кўпчиликка эришгани маълум қилинди.
