Кеча, 20 февраль куни Шаҳрисабз шаҳар Фуқаролик ҳолати далолатномаларини ёзиш бўлими томонидан “Заргарлик” маҳалла фуқаролар йиғинида яшовчи 1930 йилда туғилган Хосият Исмаиловага узоқ йиллардан сўнг туғилганлик ҳақидаги гувоҳнома тантанали равишда топширилди. Бу ҳақда шаҳар Адлия бўлими хабар берди.
Маълум қилинишича, ҳужжатни расмийлаштириш жараёни белгиланган тартибда амалга оширилиб, онахонга туғилганлик ҳақидаги гувоҳномани топшириш маросими ташкил этилган.
“Туғилганлик ҳақидаги гувоҳнома шахснинг ҳуқуқий мақомини белгиловчи энг муҳим ҳужжатлардан бири ҳисобланади. У фуқаронинг шахс сифатида давлат томонидан тан олиниши, ҳуқуқ ва эркинликларининг кафолатланиши, турли ижтимоий хизматлардан фойдаланиши учун асос бўлиб хизмат қилади”, дейилади хабарда.
96 ёшни қаршилаган Хосият Исмаилова учун мазкур ҳужжат нафақат оддий расмий қоғоз, балки кўп йиллик кутишлардан сўнг тикланган адолат ва эътибор ифодасига айланди.
