Ҳиндистоннинг Таtа Моtоrs компанияси 2026-йилги янгиланган Тiago хетчбекини тақдим этди. Модель арзон нархи билан ажралиб туради ва бензин, газ ҳамда электр версияларида таклиф этилади.
Автомобилнинг бензинли талқини 469 минг рупий — тахминан 4900 доллардан, электр версияси эса 699 минг рупий — тахминан 7300 доллардан сотувга чиқарилади.
Янгиланган Тiago янги фаралар, ўзгартирилган бампер ва замонавийроқ олд дизайнга эга бўлди. Электр версияси эса LED чироқлар билан безатилган ўзига хос кўринишга эга.
Салон ҳам янгиланган: янги рул, рақамли асбоблар панели ва 10,25 дюймли мултимедиа экрани ўрнатилган.
Асосий комплектацияда кондиционер, олтита хавфсизлик ёстиқчаси ва барқарорликни назорат қилиш тизими мавжуд. Қимматроқ версияларда калициз кириш, иқлим назорати, 360 даражали камера, круиз-назорат, симсиз қувватлаш ва ёмғир ҳамда ёруғлик датчиклари ҳам таклиф этилади.
Бензинли модел 86 от кучига эга 1,2 литрли двигатель билан жиҳозланган. Газли версиянинг қуввати 76 от кучини ташкил этади. Харидорлар механик ёки роботлаштирилган узатмалар қутисини танлаши мумкин.
Электр Тiago.ev икки хил батарея билан таклиф этилади: 19,2 кВт/соатли батарея бир қувватлашда 226 км, 24 кВт/соатли батарея эса 285 км масофани босиб ўтишга имкон беради. Электромотор қуввати 75 от кучигача етади.
