Аввалроқ, “Taftish.uz” сайтининг 4 нафар ходими товламачилик ва фирибгарликда гумонланиб қўлга олингани ҳақида хабар берилган эди. Мазкур ҳолат бўйича Ички ишлар вазирлиги қўшимча маълумот берди.
Қайд этилишича, Ўзбекистон Республикаси Ички ишлар вазирлиги ҳузуридаги тергов департаменти ва унинг қуйи тизимлари томонидан 27 нафар фуқаронинг мурожаатлари асосида 21 та ҳолатда Жиноят кодексининг 168-моддаси, (фирибгарлик) 165-моддаси, (товламачилик) 139-моддаси (туҳмат) ва 244-6-моддасида (ёлғон ахборот тарқатиш) назарда тутилган жиноят аломатлари билан жиноят ишлари қўзғатилиб, дастлабки тергов ҳаракатлари олиб борилмоқда.
Юқорида кўрсатилган ҳолат бўйича бугун, 16 январь куни соат 11:00 ларда 5 нафар фуқаро: 1988 йилда туғилган Абираев Ғайрат Нусратович, 2006 йилда туғилган Эшқувватова Маржона Шерали қизи, 1992 йилда туғилган Йўлдошов Азизжон Баҳромжонович, 1998 йилда туғилган Нишонов Дилшод Тоҳирович ва 2000 йилда туғилган Ҳамидов Сардор Муҳсин ўғли процессуал тартибда гумонланувчи сифатида жалб этилган.
Мазкур шахсларнинг жиноят иши бўйича гумонланувчи тариқасида жалб этилишига фуқароларнинг аризалари, терговга тақдим этилган аудио-видео ёзувлар, суд экспертиза хулосалари, гувоҳларнинг кўрсатмалари ва бошқа далиллар асос бўлган.
Билдирилишича, мазкур жиноят иши сифатли, ҳар томонлама ва адолатли тергов қилиниши, ишга алоқадор шахсларнинг ҳаракатлари, қонуний ҳимоя қилиниши, исботланиши лозим бўлган барча ҳолатлар тўлиқ ва холисона текширилиши тергов департамент раҳбари томонидан назоратга олинган.
“Мазкур жиноят иши бирон-бир оммавий ахборот воситаси ва ижтимоий тармоқ вакилларига қаратилмаган бўлиб, фуқароларнинг мурожаатлари асосида айрим шахсларнинг хатти-ҳаракатларига дастлабки тергов ҳаракатлари давомида қонуний баҳо берилмоқда”, дейилади хабарда.
Фуқаролардан Ички Ишлар вазирлигининг расмий манбаларида эълон қилинмаган, асосланмаган маълумотларни тарқатмаслик сўралади.
