World Population Review (WPR) портали дунёнинг турли мамлакатларида спиртли ичимликларни истеъмол қилиш бўйича маълумотларни эълон қилди. Келтирилган статистик маълумотларга кўра, Ўзбекистонда алкоголь истеъмоли йилига киши бошига 2,1 литр тоза спиртни ташкил этади.
Рейтинг муаллифларининг таъкидлашича, Марказий Осиё мамлакатларида спиртли ичимликларни истеъмол қилиш умуман олганда камроқ, бу ислом диний анъаналарининг таъсири билан боғлиқ. Масалан, Қозоғистонда бу кўрсаткич 5,4 литрни, Ўзбекистонда эса 2,1 литрни ташкил этади.
Постсовет ҳудудидаги энг паст кўрсаткичлар Тожикистон (0,7 литр) ва Туркманистонда (0,3 литр) қайд этилган. Қирғизистонда эса киши бошига 3,9 литрни ташкил этмоқда.
Шарқий ва Марказий Европа мамлакатлари, WPR маълумотларига кўра, дунёда спиртли ичимликлар истеъмоли бўйича етакчига айланди. Биринчи ўринни Руминия (17,1 литр), кейинги ўринларни Грузия (15,5 литр) ва Латвия (14,7 литр) эгаллаган. Кучли бешликка Молдова (14,1 литр) ва Чехия (13,7 литр) ҳам кирди.
Ҳисоботда аниқлик киритилишича, баъзи мамлакатлар, жумладан, Саудия Арабистони, Афғонистон ва Бангладешда спиртли ичимликлар истеъмоли бўйича маълумотлар йўқ. Минимал кўрсаткичлар – йилига 0,1 литр – Миср, Покистон, Индонезия, шунингдек, Эрон, Сурия ва Қувайтда қайд этилган.
World Population Review – 2013 йилда ташкил этилган мустақил илмий нашр ва маълумотнома бўлиб, демографик маълумотлар ва статистикага ихтисослашган.
