Ўзбекистонда 1 октябрь ҳолатига кўра қарийб 150 минг киши ўзига кредит расмийлаштирилишини тақиқлади. Бу ҳақда Кредит-ахборот таҳлилий маркази хабар берди.
Маълум қилинишича, 149 465 нафар жисмоний шахс кредит беришда ўзини ўзи тақиқлаш бўйича бепул “Кредитга тақиқ” хизматга уланди. Уларнинг 101 467 нафарини эркаклар, 47 998 нафарини аёллар ташкил этди.
Кредит олишни ўз-ўзига тақиқлаш хизматидан энг кўп 26−35 ёшдаги фуқаролар фойдаланди — улар барча фойдаланувчиларнинг учдан бир қисмини ташкил қилди (33,6 фоиз). Кейинги ўринларда 36−45 ёшлилар (25,6 фоиз) 26 ёшгача бўлганлар (19,2 фоиз), 46-55 ёшлилар (12,6 фоиз) ва 56 ёшдан катталар ушбу хизматдан фойдаланди.
Кредит расмийлаштирилишини тақиқлаш ҳақида
Ўзига кредит ажратилишини тақиқлаш бу қарз, микрокредит ва кредит карталарини олиш имкониятидан вақтинчалик ёки муддатсиз воз кечиш тўғрисидаги ихтиёрий қарор. Жисмоний шахслар учун ўз маълумотларини кредит битими тузиши тақиқланган шахслар реестрига киритиш хизмати 6 июндан бошлаб ишга туширилганди. Бу орқали фуқаролар ўзларининг иштирокисиз ёки хабарисиз кредит битими расмийлаштирилишининг олдини олиш учун ўзи билан кредит битимини тузишни тақиқлаши мумкин бўлади. Хизматдан фойдаланиш бепул бўлиб, чеклов ҳам қўйилмаган — тақиқни исталганча ўрнатиш ва олиб ташлаш мумкин.
Кредитга тақиқ қандай қўйилади?
Ушбу хизматни ёқиш ёки ўчиришни онлайн ва офлайн шаклда бир нечта усуллар орқали амалга ошириш мумкин:
- Кредит-ахборот таҳлилий маркази мобил иловаси орқали — “Оммабоп хизматлар” бўлимидан “Кредитга тақиқ” хизмати орқали (Android, iOS ва Huawei AppGallery);
- Кредит бюросининг веб-сайтида шахсий кабинет ёки Call-марказ (+998 712034747) орқали;
- Ягона интерактив давлат хизматлари порталида “Кредит битимини тузишга тақиқ қўйиш ёки тақиқни олиб ташлаш” хизмати орқали;
- Давлат хизматлари марказлари орқали.
Бу хизмат нега жорий этилди?
Ўзига кредит олишни тақиқлаш имконияти жисмоний шахс ўзининг иштирокисиз ёки хабарисиз кредит битимини расмийлаштириш билан боғлиқ фирибгарликларнинг олдини олиш мақсадида йўлга қўйилди. Ўзбекистонда 5 йилда кибержиноятлар билан 1,9 трлн сўмдан ортиқ пул талон-торож қилинган бўлиб, 4 фоизи шахс номига онлайн кредит расмийлаштириш орқали амалга оширилган.
