Россияда патент асосида ишлаётган мигрантларга камида бир йил давомида иш жойини ўзгартиришни тақиқлаш таклиф қилинди. Ташаббус Леонид Слуцкий бошчилигидаги Либерал демократик партия (ЛДП) депутатларига тегишли.
Давлат Думасига тегишли қонун лойиҳаси киритилди. Унга кўра, мигрантга камида бир йил иш жойини ўзгартириш ва қўшимча иш билан шуғулланишга рухсат берилмайди. “Россияда чет эл фуқароларининг ҳуқуқий ҳолати тўғрисида”ги қонуннинг 13.3-моддасига ўзгартиришлар киритиш таклиф этилмоқда.
Агар меҳнат шартномаси асосли сабабларсиз муддатидан олдин бекор қилинса, мигрантнинг патенти бекор қилинади ва у мамлакатни тарк этишга мажбур бўлади. Бироқ иш жойидан бўшаш компания фаолияти тугатилиши, фавқулодда ҳолатлар ёки иш ҳақи тўланмаслиги каби объектив сабабларга кўра юз берса, мигрантга янги иш топиш учун 30 кун берилади.
Ташаббус муаллифларининг фикрича, бундай чора қурилиш, қишлоқ хўжалиги ва уй-жой коммунал хўжалиги каби асосий тармоқларда кадрлар алмашинувини камайтириш, мигрантлар ва иш берувчиларнинг масъулиятини ошириш ва миграция маъмуриятчилигини яхшилаш имконини беради.
Маълумот учун, 2024-йилда айнан Россияда Либерал демократик партияси мигрантларга уй-жойни шартнома асосида ва максимал бир йилга беришни таклиф қилганди.
“Элементар қоидаларга риоя қилмайдиган хорижлик ижарачилар билан қўшничилик мамлакатимизнинг туб аҳолиси учун ҳақиқий муаммога айланди. Шовқин, чиқинди, муштлашувлар, оломон — реал вазият шундай кўринади. Одамлар фарзандлари ва ўзлари учун хавотирга тушмоқда. Бундай хонадонларнинг эгаларини топиш ниҳоятда қийин, полицияни чақириш эса мигрантларнинг тажовузкорлигини янада кучайтиради. Қабулхонамизга шундай минглаб мурожаатлар келиб тушмоқда!”, деган эди ўшанда Слуцкий.
У Москвадаги арзон уй-жойларнинг 85 фоизида мигрантлар яшашини айтган. Шунингдек, қонунбузар муҳожирларни ҳам, “резина” квартиралар пайдо бўлишига кўмаклашса, уй эгаларини ҳам жазолаш кераклигини билдирган.
