Мақом санъатининг йирик намояндаларидан бири, профессор, Ўзбекистонда хизмат кўрсатган артист, таниқли хонанда ва мумтоз мақом ижрочиси Хадия Юсупова 88 ёшида вафот этди. Бу ҳақда Ўзбек миллий мақом санъати маркази хабар берди.
1938-йил сентябрь ойида Наманган шаҳрида таваллуд топган Хадия Юсупова бутун умрини миллий мусиқа ва мақом санъатини ривожлантиришга бағишлаган. У ёшлигидан санъатга меҳр қўйиб, 3 ёшидан қўшиқ куйлашни бошлаган.
1956-йилда Москвада ўтказилган ёшлар фестивалида биринчи ўринни эгаллаб, 1957-йилда Ўзбекистон давлат филармониясига ишга қабул қилинди. Кейинчалик Ўзбекистон радиоси қошидаги ансамблда Берта Давидова ва Коммуна Исмоилова каби устоз санъаткорлар билан биргаликда фаолият олиб борган.
1958-йилда Юнус Ражабий раҳбарлигида ташкил этилган “Мақом” ансамбли таркибида фаолият юритиб, мақом санъатининг бебаҳо дурдоналарини чуқур ўрганиб, уларни юксак маҳорат билан ижро этган. Республика радиоси ва телевидениесида “Шоҳи белбоғ”, “Кўнгил ол”, “Савти Сабо” каби кўплаб мумтоз ашулаларни моҳирона ижро этиб, миллий мусиқамиз олтин хазинасига улкан ҳисса қўшган.
1988-йилдан бошлаб Манон Уйғур номидаги Тошкент давлат санъат институтида (ҳозирги Ўзбекистон давлат санъат ва маданият институти) анъанавий ижрочилик йўналишида ёш авлодга сабоқ бериб, кўплаб шогирдлар тарбиялаган.
