Украина Президенти Владимир Зеленский бугун, 17 ноябрь куни Парижга ташрифи чоғида Франция билан ҳаво мудофаа тизимлари, жанговар самолётлар ва ракеталарни етказиб бериш бўйича муҳим келишувлар тузиши кутилмоқда. Бу ҳақда “Reuters” хабар берди.
“Франция билан тарихий келишув тайёрланди – биз жанговар авиациямизни, ҳаво мудофаа кучларимизни ва бошқа мудофаа салоҳиятимизни сезиларли даражада мустаҳкамлаймиз. Битим душанба куни имзоланиши режалаштирилган”, деб ёзган Зеленский Х (собиқ Twitter)даги саҳифасида
Маълумотларга кўра, Франция Зеленскийга бир нечта SAMP/Т ҳаво мудофаа тизимлари ва Аster-30 туридаги ер‑ҳаво ракеталарини таклиф қилиши мумкин. Шу билан бирга, 10 йиллик стратегик авиация келишуви ҳам муҳокама қилинади, жумладан Dassault Rafale самолётларини етказиб бериш режалаштирилган.
Келтирилишича, баъзи самолётлар Франциянинг ҳозирги захираларидан олинади, қолганлари эса Украина узоқ муддатли жанговар авиация паркини кенгайтириш режасига киритилади. Зеленский илгари Украина 250 та жанговар самолётга эга флот яратишни мақсад қилганини билдирган, шу жумладан АҚШнинг F‑16 ва Швециянинг Gripen самолётлари ҳам назарда тутилган.
Янги самолётларни ишлатиш учун Украина учувчилари махсус тайёргарликдан ўтиши зарур бўлади.
Ташриф давомида SAMP/Т тизимларини кенгайтириш бўйича янги битимлар ҳам тузилиши кутилмоқда – баъзилари мавжуд захиралардан, бошқалари узоқ муддатли буюртмалар орқали амалга оширилади. Шу билан бирга, Украина ва Франциянинг дрон технологиялари бўйича ҳам ҳамкорлиги кенгайиши режалаштирилган.
