Андижонда ўтказилган тезкор тадбирлар давомида қарийб 2,5 кг “гашиш” моддаси мусодара қилинди. Бу ҳақда Давлат хавфсизлик хизмати хабар берди.
Маълум қилинишича, Асака туманида ўтказилган тезкор тадбир давомида Lacetti русумли автотранспорт воситаси тўхтатилиб, кўздан кечирилган. Текширув жараёнида автомашинада бўлган Наманган ва Марғилон шаҳарларида яшовчи, 1970, 1981 ва 1984 йилларда туғилган 3 нафар фуқарога тегишли 2 кг “гашиш” моддаси борлиги аниқланиб, ҳолат процессуал тартибда расмийлаштирилган.
Шунингдек, Марҳамат туманида ўтказилган тезкор тадбирда эса Қува шаҳрида яшовчи, 1985 йилда туғилган фуқаро бошқарувидаги Cobalt русумли автомашинадан 497 гр “гашиш” моддаси ашёвий далил сифатида олинган.
Ҳозирда ҳар икки ҳолат бўйича жиноят ишлари қўзғатилиб, “қамоқ” эҳтиёт чораси қўлланилган. Тергов ҳаракатлари олиб борилмоқда.
