Ўзбекистон президентининг 26 ноябрдаги қарори билан Ўзбек—француз университети ташкил этилиши белгиланди.
Ҳужжатга кўра, университет ўз фаолиятини Ўзбекистон қонунчилиги талаблари ҳамда Франция университетлари консорсиуми тавсиялари асосида амалга оширади.
Университетда дастлабки босқичда магистратура, кейинчалик босқичма-босқич бакалавриат ва докторантурада кадрлар тайёрлаш йўлга қўйилади. Шунингдек, университетга кириш учун тайёрлов курси жорий этилади.
Таълим жараёни мақсадли давлат гранти ва тўлов-контракт асосида амалга оширилади. Битирувчиларга университет дипломи ва (ёки) Францияда аккредитациядан ўтган таълим дастурлари бўйича консорсиум таркибига кирган тегишли Франция университетининг дипломи берилади. Бунда битирувчиларга берилган диплом Ўзбекистонда тан олинади.
Тошкентда Ўзбекистон—Франция университети ташкил этиш режаси ҳақида 2024 йил март ойида маълум қилинганди. Олий таълим, фан ва инновациялар вазири Қўнғиротбой Шарипов Франциянинг ўша вақтдаги элчиси Орелия Бушез билан учрашиб, олий таълим, профессионал таълим, илм-фан ва инновациялар соҳасида ҳамкорликни муҳокама қилганди. Тошкент шаҳрида Ўзбекистон—Франция университетини ташкил этиш, ўқув режалари, таълим дастурларини яратиш ва тасдиқлаш, профессор-ўқитувчиларни жалб этиш каби масалалар кўриб чиқилганди.
