Шавкат Мирзиёев Токиога расмий ташрифи доирасида Япониянинг етакчи университетлари ректорлари билан учрашди.
Президент матбуот хизматининг хабар қилишича, давлат раҳбари Япония таълим, маданият, спорт, фан ва технологиялар вазири Матсумото Ёхей, Япония фанни илгари суриш жамияти президенти Сугино Суёси ҳамда Япониянинг Сукуба, Нагоя, Тоттори университетлари, Токио қишлоқ хўжалиги ва технологиялар университети, Нагоя иқтисодиёт университети каби етакчи олий таълим муассасаларининг раҳбарлари билан суҳбатлашди.
Ўзбекистон президенти Япония узоқ йиллар давомида фанга сарфланадиган харажатлар ва илмий патентлар сони бўйича етакчилар сафида туришини қайд этди. Мамлакат кўплаб атоқли олимларни, хусусан, физика, кимё ва тиббиёт соҳаларида Нобель мукофоти совриндорларини етиштириб чиқарди.
Бугунги кунда 2,8 мингдан ортиқ ўзбекистонлик талаба Япониянинг етакчи таълим муассасаларида таҳсил олмоқда. Биргина JDC стипендия дастури бўйича 440 дан зиёд давлат хизматчилари Японияда ўқитилди.
Учрашувда қатнашган Япония университетлари Ўзбекистон учун энг долзарб бўлган сунъий интеллект ва рақамли технологиялар, қишлоқ ва сув хўжалиги, “яшил” энергия ва барқарор ривожланиш, сейсмология ва “ақлли шаҳар” технологиялари каби соҳалар бўйича мустаҳкам илмий-тадқиқот инфратузилмасига ва юқори илмий ҳамда педагогик салоҳиятга эга эканлиги таъкидланди.
Ушбу йўналишлар бўйича Ўзбекистон университетлари билан яқин ҳамкорлик бошланган. Куни кеча қўшма лойиҳаларни амалга ошириш бўйича қизғин музокаралар бўлиб ўтди ва янги келишувларга эришилди.
Ҳамкорликни янада ривожлантириш учун таълим ва фан бўйича қўшма комиссия, инновациялар бўйича консорсиум ташкил этиш, флагман лойиҳалар, шу жумладан ўқув жараёнига СИни жорий этиш лойиҳаларини амалга ошириш ҳамда муҳандислик мутахассисликлари бўйича ўқув дастурини ишга тушириш таклиф қилинди.
Тадбир доирасида олий таълим соҳасида ҳамкорлик тўғрисидаги ҳукуматлараро битим, Сукуба университети билан биргаликда Ўзбекистонда олий таълим муассасасини ташкил этиш тўғрисидаги меморандум ҳамда илмий ҳамкорлик ва кадрлар тайёрлаш соҳаларида бир қатор бошқа ҳужжатлар имзоланди.
Эришилган келишувларни тизимли ва ўз вақтида амалга оширишни таъминлаш учун “йўл харитаси” қабул қилинади.
Сукуба университети — Япониянинг Ибараки префектураси, Сукуба шаҳридаги олийгоҳ бўлиб, 1973-йилда ташкил этилган . Ушбу ОТМ Япониядаги энг яхши 10 та университет қаторига киради. Сукуба университетини битирганлаэнинг уч нафари Нобель мукофоти совриндори бўлган.
2024-йилнинг октябрида Олий таълим, фан ва инновациялар вазири Қўнғиротбой Шарипов Сукуба университети раҳбари Нагата Кёсуке бошчилигидаги делегацияни қабул қилиб, Ўзбекистонда Япония билан ҳамкорликда олий таълим муассасаси ташкил этиш масаласини муҳокама қилганди. Ўзбекистон таълим тизимининг ривожига ҳисса қўшадиган янги халқаро университетни ташкил этиш бўйича дастлабки келишувга эришилганди.
Ўшанда Инвестициялар, саноат ва савдо вазирлигида вазир Лазиз Қудратов ҳам Сукуба университети президенти Нагата Кёсуке билан учрашиб, Ўзбекистонда Япония таълим дастурлари асосидаги олий таълим муассасаси очилишини назарда тутган ҳолда ҳамкорликни ривожлантириш истиқболларини кўриб чиққанди.
Вазирлик бу кўплаб ўзбек ёшларига мамлакатида Япония стандартларига жавоб берадиган сифатли таълим олиш имконини беришини қайд этганди.
