Покистон ўзаро мудофаа шартномасига биноан Саудия Арабистонига 8 минг нафар ҳарбий хизматчи, қирувчи самолётлар эскадрони ва ҳаво мудофаа тизимини жойлаштирди. Исломобод Эрон урушида асосий воситачи ролини ўйнаётган бўлса-да, Ар Риёд билан ҳарбий ҳамкорликни кучайтирмоқда. Бу ҳақда манабаларга таяниб Reuters хабар берди.
Ушбу маълумотни уч нафар хавфсизлик расмийси ва ҳукуматдаги икки манба тасдиқлади. Уларнинг сўзларига кўра, бу кучлар қиролликка яна ҳужум уюштирилган тақдирда Саудия армиясини қўллаб-қувватлашга мўлжалланган қўшин ҳисобланади.
Покистон ҳарбийлари, мамлакат Ташқи ишлар вазирлиги ва Саудия ҳукуматининг медиа идораси ушбу ҳолат бўйича берилган сўровларга жавоб қайтармади. 2025-йилда имзоланган мудофаа шартномасининг тўлиқ шартлари махфий ҳисобланади.
Бироқ ҳар икки томон ҳужум содир бўлган тақдирда бир-бирини ҳимоя қилиши шартлигини маълум қилган. Покистон мудофаа вазири Хавожа Асиф аввалроқ ушбу келишув Саудияни Исломободнинг “ядровий соябони остига олишини” шама қилган эди.
Ҳарбий техникалар ва эскадронлар
Манбаларнинг маълум қилишича, Покистон апрель ойи бошида Саудияга тахминан 16 та самолётдан иборат тўлиқ эскадронни юборган. Булар асосан Хитой билан биргаликда ишлаб чиқарилган JF-17 қирувчи самолётларидир. Хавфсизлик расмийларидан иккитасининг айтишича, Покистон иккита дрон эскадронини ҳам жўнатган.
Барча бешта манбанинг айтишича, зарурат туғилса, яна қўшимча кучлар юбориш мажбурияти олинган. Шунингдек, ҳудудга Хитойнинг HQ-9 ҳаво мудофаа тизими ҳам жойлаштирилган. Техникаларни Покистон ҳарбийлари бошқармоқда, лойиҳа эса Саудия Арабистони томонидан молиялаштирилмоқда.
Минглаб қўшимча аскарлар
Эрондаги уруш пайтида жойлаштирилган ҳарбий ва ҳарбий-ҳаво кучлари ходимлари, асосан, маслаҳат бериш ва ўқитиш вазифасини бажаради. Буни икки мамлакат ўртасидаги алоқаларни ва ҳарбий активларни жойлаштиришга оид ҳужжатларни кўрган икки нафар хавфсизлик расмийси маълум қилди. Бу кучлар аввалги келишувлар асосида қиролликда жанговар вазифаларни бажараётган минглаб покистонлик аскарлар сафига бориб қўшилади.
Махфий мудофаа шартномаси матнини кўрган ҳукумат манбаларидан бирининг айтишича, ҳужжатда Саудия Арабистонига 80 минг нафаргача покистонлик аскар юборилиши кўзда тутилган. Улар Саудия кучлари билан биргаликда қироллик чегаралари хавфсизлигини таъминлашга ёрдам беради. Икки нафар хавфсизлик расмийси келишув доирасида Покистон ҳарбий кемаларини ҳам жойлаштириш кўзда тутилганини айтди.
Бундан олдин АҚШ ва Эрон ўртасидаги музокараларда воситачи бўлиб келган Покистон Теҳрон самолётларини ўз аэродромларида яширинча сақлагани ҳақида хабар берилганди. Маълум қилинишича, самолётлар эҳтимолий Америка зарбаларидан ҳимояланиш мақсадида аэродромларга жойлаштирилган.
АҚШ президенти Дональд Трамп ўт очишни тўхтатишни эълон қилганидан бир неча кун ўтиб, апрель ойи бошида Эроннинг бир нечта самолёти Покистондаги Нур Хон авиабазасига юборилган. Улар орасида Эрон Ҳарбий-ҳаво кучларига тегишли, разведка учун мўлжалланган RC-130 самолёти ҳам бўлган.
