29 декабрь, душанба кунидан бошлаб Францияда тезликни 50 км/соатдан ортиқ оширган ҳайдовчилар уч ойгача қамоқ ва 3750 евро жарима жазоси билан жазоланади. Бу ҳақда маҳаллий ОАВ хабар бермоқда.
Та`кидланишича, ҳуқуқбузарлик Бешинчи республика ҳокимиятининг қонун ва фармонлари чоп этиладиган Journal officiel (“Расмий журнал”) нашрига мувофиқ “судланганлик тўғрисидаги ёзув” билан қайд этилади.
Фармон 2025 йил 9 июлдаги “йўл ҳаракати қоидабузарликларига қарши курашишга қаратилган” қонун асосида қабул қилинган.
Илгари тезликни ошириш қоидабузарлиги 5-даражали жарима билан жазоланган. Бу энг оғир жарима бўлиб, фақат такрорий ҳуқуқбузарлик ҳайдовчилик гувоҳномасидан маҳрум қилиш билан якунланарди.
Франция Йўл ҳаракати хавфсизлиги департаментининг тушунтиришича, рухсат этилган максимал тезликни сезиларли даражада ошириб ҳайдаш “авария ҳолатида жиддий оқибатларга олиб келиши мумкин бўлган ўта хавфли хатти-ҳаракатдир”.
“Тезлик режимининг бу ўта жиддий бузилишини жиноят сифатида таснифлаш ва янада қатъий ҳуқуқий чораларни қўллаш орқали биз йўллардаги зўравонликка энди йўл қўйиб бўлмаслиги ҳақида аниқ сигнал бермоқдамиз”, дейди Ички ишлар вазирлиги вакили Мари-Пер Ведрен.
Баёнотда айтилишича, ҳаддан ташқари тезлик реакция вақтини қисқартиради, тормозлаш масофасини узайтиради, транспорт воситасини бошқаришни ёмонлаштиради ва тўқнашувда зарба кучини оширади.
2024-йилда Йўл ҳаракати хавфсизлиги хизмати “50 км/соат ва ундан юқори” тезликдаги 63 217 та қоидабузарликни қайд этган бўлиб, бу 2017-йилга нисбатан 69 фоизга кўпдир.
“Тезликни оширган ҳайдовчиларнинг транспорт воситалари мусодара қилинади ва уларнинг ҳайдовчилик гувоҳномаси уч йил муддатга тўхтатилади. Уларга беш йил ёки ундан кўпроқ вақт давомида “маълум ер усти транспорт воситаларини бошқариш” тақиқланади ва улар йўл ҳаракати хавфсизлиги бўйича хабардорликни ошириш курсидан ўтишлари шарт бўлади”, дейди расмийлар.
