АҚШда жинсий зўравонликлар содир этган жиноятчи Жеффри Эпштейнга оид очиқланган миллионлаб ҳужжатлар “глобал жиноий ташкилот” мавжудлигини кўрсатади ва бу ҳаракатлар инсониятга қарши жиноятлар даражасига етиши мумкин. Бу ҳақда БМТ инсон ҳуқуқлари кенгаши томонидан тайинланган мустақил экспертлар гуруҳига таяниб The Guardian хабар берди.
Экспертларнинг таъкидлашича, АҚШ Адлия вазирлиги томонидан эълон қилинган ҳужжатлардаги жиноятлар ирқчилик, коррупция ва аёлларга нисбатан кескин нафрат фонида содир этилган. Улар бу жиноятлар аёллар ва қизларни буюмга айлантириш ҳамда уларнинг инсоний қадр-қимматини йўқотишни кўрсатишини айтишди.
Аёллар ва қизларга нисбатан бундай ваҳшийликларнинг кўлами, табиати, тизимли характери ва халқаро қамрови шунчалик оғирки, уларнинг бир қисми инсониятга қарши жиноятлар мезонларига тўғри келиши мумкин, дейилади баёнотда.
Экспертлар ҳужжатлардаги айбловлар мустақил, пухта ва холис терговни талаб этиши, шунингдек, бундай жиноятлар қандай қилиб узоқ вақт содир этилганини аниқлаш учун суриштирув ўтказилиши кераклигини таъкидлади.
Ноябрь ойида АҚШ Конгресси томонидан иккита партиянинг кенг қўллаб-қувватлаши билан қабул қилинган қонун Эпштейн алоқадор файлларни оммага эълон қилишни талаб қилади.
БМТ экспертлари ҳужжатларни эълон қилиш жараёнида “жиддий процессуал хатолар ва нотўғри таҳририй ўзгартиришлар”га йўл қўйилганидан хавотир билдирди. Сабаби бу ҳолат жабрланувчиларнинг шахсий маʻлумотлари ошкор бўлишига олиб келган. Ҳозиргача эълон қилинган ҳужжатларда 1 200 дан ортиқ жабрланувчи аниқланган.
Маълумотларни тўлиқ ошкор қилмаслик ёки терговни доирасини кенгайтирмаслик кўплаб жабрланувчиларнинг руҳий жароҳатланишга олиб келди ва улар буни “тизимли алдов” деб таърифламоқда, деди экспертлар.
Адлия департаменти томонидан ҳужжатларнинг эълон қилиниши Эпштейннинг сиёсат, молия, илм-фан ва бизнес соҳасидаги кўплаб таниқли шахслар билан алоқалари борлигини фош этди. Бу алоқалар унинг 2008 йилда фоҳишабозлик, жумладан вояга етмаган қизни жинсий хизматга жалб қилишда айбини тан олганидан олдин ҳам, кейин ҳам давом этган.
Эпштейн 2019 йилда вояга етмаганларни жинсий эксплуатация қилиш бўйича федерал айбловлар билан яна ҳибсга олингач, қамоқхонада ўлик ҳолда топилган. Унинг ўлими ўз жонига қасд сифатида баҳоланган.
