Бугун, 3 декабрь куни Андижон вилоятининг Шаҳрихон туманида ҳоким Ҳикматилло Дадахонов экологик рейд давомида сомсахона тандирларини буздириб ташлади. Мазкур ҳолат юзасидан вилоят ҳокимлиги муносабат билдирди.
Ўтказилган экологик рейд ҳақида дастлаб туман ҳокимлигининг Telegram-каналида эълон қилинган, кейинроқ эса хабар ўчириб юборилган.
“Андижон вилояти ҳокими топшириғига асосан, Шаҳрихон туманида ҳаво ифлосланишининг олдини олиш ҳамда экологик барқарорликни таъминлаш мақсадида ташкил этилган ишчи гуруҳи томонидан тун-у кун рейд тадбирлари олиб борилмоқда. Бугун эрта тонгдан ҳаво ифлосланишига сабаб бўлаётган объектлар фаолияти жойида ўрганилиб, талабларга жавоб бермаётган умумий овқатланиш ва аҳолига маиший хизмат кўрсатиш объектларида фаолиятини вақтинча тўхтатиш бўйича қатъий чоралар кўрилмоқда”, дейилади туман ҳокимлиги хабарида.
Вилоят ҳокимлиги эса ҳокимнинг жазолангани ҳақида хабар берди.
“Ижтимоий тармоқларда Шаҳрихон туманида ҳаво ифлосланишини олдини олиш ҳамда экологик барқарорликни таъминлаш мақсадида ташкил этилган ишчи гуруҳи томонидан ўтказилган рейд тадбирлари давомида гуруҳ раҳбари туман ҳокимининг кўрсатмаси билан умумий овқатланиш объектларидаги тандирларга зарар етказилгани акс этган видеолавҳалар тарқалмоқда. Ушбу ҳолат зудлик билан ўрганилиб, масъулиятсизликка йўл қўйган туман ҳокимига интизомий жазо чораси сифатида “ҳайфсан” берилди”, дейилади ҳокимлик муносабатида.
Қайд этилишича, бундай ҳолатларни такрорламаслик борасида тушунтириш ишлари олиб борилган.
Мазкур ҳолат бўйича Бизнес-омбудсман ҳам муносабат билдирди.
Қайд этилишича, экологик вазиятни яхшилашга қаратилган чора-тадбирларни амалга ошириш жараёнида айрим ҳудудларда тадбиркорларнинг қонуний мулкига зарар етказиш ҳолатлари кузатилаётгани ҳақида мурожаатлар тушмоқда.
“Тадбиркорлик фаолиятининг эркинликлари кафолатлари тўғрисида”ги қонунга мувофиқ, хусусий мулк бошқа мулк шакллари каби дахлсиз ва давлат ҳимоясида. Тадбиркорлик субъектини тугатиш ёки унинг мол-мулкига нисбатан бошқа чоралар кўриш фақатгина ваколатли орган ёхуд суд қарорига биноан амалга оширилади.
“Шу муносабат билан ваколатли давлат органларини ушбу муҳим жараёнларда тадбиркорлик фаолияти субъектларининг қонуний манфаатлари ва мулкий ҳуқуқларини таъминлашга, хусусий мулкка нисбатан қонун бузилишига йўл қўймасликка ва ҳар қандай чораларни амалдаги қонунчилик асосида амалга оширишга чақирамиз”, дейилади муносабатда.
