Финляндия пойтахти Ҳелсинки шаҳрида янги Круунувуоренсилта кўприги фойдаланишга топширилди. У Коркеасаари ва Круунувуоренранта ҳудудларини боғлайди. Бу ҳақда “Euro news” хабар берди.
Узунлиги 1191 метр бўлган ушбу иншоот Финляндиядаги энг узун ва энг баланд кўприк ҳисобланади. Бироқ у автомобиллар учун мўлжалланмаган – ундан фақат пиёдалар, велосипедчилар ва жамоат транспорти фойдаланиши мумкин.
Янги кўприк туфайли Круунувуоренранта ҳудудидан шаҳар марказигача бўлган масофа 11 километрдан 5,5 километргача қисқарди.
Шаҳар мери Даниел Сазонов кўприкни Ҳелсинкининг янги рамзий масканларидан бири деб атади. Унинг айтишича, бу жой яқин ва узоқ ҳудудлардан ташриф буюрувчиларни жалб қилади ҳамда шаҳарнинг умумий тузилиши ҳақидаги тасаввурни ўзгартиради.
Кўприк иш бошлаган илк дам олиш кунларидаёқ унга 50 мингдан ортиқ киши ташриф буюрган.
Маълумот учун, ҳозирги кунда энг узун кўприк ҳисобланган Danyang–Kunshan Grand Bridge Хитойда жойлашган бўлиб, унинг узунлиги тахминан 164 километрни ташкил этади. Бу кўприк Пекин–Шанхай тезюрар темирйўл линиясининг бир қисми бўлиб, асосан сувли ва пасттекис ҳудудлардан ўтади.
