Ҳиндистоннинг аҳоли энг зич жойлашган Уттар Прадеш штатида содир бўлган кучли бўрон, ёмғир ва дўл оқибатида 100 дан ортиқ киши ҳалок бўлди. Бу ҳақда мамлакат қутқарув хизмати расмийларига таяниб Reuters хабар берди.
Штат расмийларига кўра, 13 май куни юз берган табиий офат оқибатида 59 киши жароҳатланган. Шунингдек, 87 та уй зарар кўрган ва 114 бош чорва нобуд бўлган.
Штатнинг ёрдам кўрсатиш бўйича комиссари Ришикеш Бҳаскар Яшоднинг Reuters агентлигига маълум қилишича, камида 104 киши ўнга яқин туманда ҳалок бўлган. Энг оғир талафот ҳиндлар зиёратгоҳи ҳисобланган Праяграж шаҳри атрофидаги ҳудудларда қайд этилган.
“Биз яшайдиган бутун ҳудуд ярим соат давомида қоп-қоронғи бўлиб қолди”, деди Сонбҳадра туманидаги Обра саноат шаҳарчасида яшовчи Ашок Рай.
Унинг сўзларига кўра, кучли шамол реклама пешлавҳалари ва кўча белгиларини учириб кетган, ердаги кўмир чангларини ҳавога кўтарган. Телевидение орқали намойиш этилган тасвирларда илдизи билан қўпорилган дарахтлар ва автомобиллар устига қулаган реклама тахталарини кўриш мумкин.
Телеканаллар орқали тарқалган видеолавҳалардан бирида кучли шамол бир одамни ўзи маҳкам ушлаб турган тунука иншоотдан юлқиб олиб, ҳавога учириб юборгани акс этган. Барейли туманида юз берган ушбу ҳодисада эркак киши жароҳатланган, бироқ у омон қолган. Расмий маълумотларга кўра, одамларнинг аксарияти дарахтлар қулаши ва деворлар босиб қолиши оқибатида ҳалок бўлган.
Бош вазир Нарендра Модининг Бҳаратия Жаната партияси томонидан бошқариладиган штат бош вазири Ёги Адитянат расмийларга қатъий топшириқ берди. Унга кўра, офатдан омон қолганларга ёрдам кўрсатилиши ва 24 соат ичида молиявий кўмак пуллари тарқатилиши шарт.
Ҳиндистон шимолида март ойидан июнгача бўлган иссиқ мавсумда бўронлар тез-тез содир бўлиб туради. Муссон ёмғирлари бошлангандан кейингина бундай офатлар бир оз тинчийди.
