Тошкент вилоятининг Юқори Чирчиқ тумани ҳамда Янгийўл шаҳрида хориждан олиб келинган синтетик наркотик моддалар топилди. Бу ҳақда Давлат хавфсизлик хизмати хабар берди.
Маълум қилинишича, Тошкент шаҳрида яшовчи, муқаддам судланган, ҳозирда пробация ҳисобида турган шахс ва унинг шериги Тошкент вилоятининг Юқори Чирчиқ туманида жойлашган дала майдонидаги хуфия жойдан 2 кг 381 гр “Алфа-ПВП” синтетик гиёҳвандлик воситасини олиб, ортга қайтаётган вақтларида Давлат хавфсизлик хизматининг Тошкент вилояти бўйича бошқармаси ҳамда Божхона органлари ходимлари томонидан қўлга олинган.
Аниқланишича, ушбу синтетик наркотик модда Telegram мессенжеридаги интернет наркодўкон аъзолари томонидан Россиядан Ўзбекистонга олиб келинган.
Бошқа ҳолатда эса, Янгийўл шаҳрида фаолият юритувчи тижорат банкларидан бирининг икки нафар мутахассиси муқаддам наркокуръерлар Янгийўл туманидаги дала майдонига яшириб кетган 485 гр “Алфа-ПВП” синтетик гиёҳвандлик воситасини қабул қилиб олиб, ўзларининг танишининг хонадонида сақлаётгани аниқланган.
Кўрилган чора-тадбирлар натижасида улардан ушбу гиёҳвандлик воситаси ашёвий далил сифатида олинган.
Билдирилишича, ҳозирда ҳар икки ҳолат бўйича жиноят ишлари қўзғатилиб, мазкур шахсларга нисбатан “қамоқ” эҳтиёт чораси қўлланилган ҳамда тергов ҳаракатлари олиб борилмоқда.
Маълумот учун, жорий йилнинг I чорагида уюшган наркожиноий гуруҳлар аҳоли орасида тарқатишни режалаштирган 227 кг (680 минг доза) анъанавий наркотиклар, 50 кг (250 минг доза) синтетик наркотиклар ва 234 минг дона (700 минг доза) психотроп моддалар ноқонуний муомаладан олинган.
