Исроилда Эрон фойдасига жосуслик қилишда гумонланиб, Тожикистон ва Россия фуқароси Беҳруз Собиржон қўлга олинди. Бу ҳақда бугун, 2 июль куни “The Times of Israel” хабар берди.
Исроил полициясининг талқинига кўра, гумонланувчи жорий йилнинг январь ойидан буён “Эрон агенти” билан алоқада бўлиб келган ва “Эронга [урушда] тезкор муваффақиятга эришишда ёрдам беришга интилган”.
Терговнинг даъво қилишича, дастлаб Собиржонга иш таклиф қилинган, бироқ кўп ўтмай у бу таклиф Эрон агенти томонидан бўлганини тушуниб етган, шунга қарамай, “у билан алоқани давом эттирган”.
- У бажарган топшириқлар орасида қуйидагилар бўлган:
- Эрон ракеталари тушган жойларни ҳужжатлаштириш (суратга/видеога олиш) ва узатиш;
- Тель-Авивдаги осмонўпар биноларнинг координаталарини тақдим этиш;
- Ҳайфа порти фотосуратларини юбориш ҳамда Исроил шимолидаги “махфий хавфсизлик объекти”ни суратга олишга уриниш.
Гумонланувчи жорий йилнинг июнь ойида қўлга олинган, прокуратура унга нисбатан айблов эълон қилишни режалаштирмоқда.
Эслатиб ўтамиз, АҚШ ва Исроил февраль ойи охирида Эрон билан уруш бошлаган эди. АҚШ ва Эрон 18 июнь куни барча фронтларда ҳарбий ҳаракатларни тўхтатишни назарда тутувчи ўзаро англашув меморандумини имзолади. Бироқ кейинчалик томонлар зарбаларни қайта тиклади. Оммавий ахборот воситаларининг хабарларига кўра, июнь ойи охирида АҚШ ва Эрон ўзаро зарбаларни тўхтатишга келишиб олган.
