Тошкент шаҳри ва Тошкент вилоятида жойлашган 106 хўжалик фаолияти вақтинча тўхтатилди, 58 иссиқхона хўжалигига нисбатан эса маъмурий жарима қўлланилди. Бу ҳақда Экология, атроф-муҳитни муҳофаза қилиш ва иқлим ўзгариши вазирлиги хабар берди.
Маълум қилинишича, вазирлик, Бош прокуратура ҳамда Тошкент шаҳар ва вилоят ҳокимликлари томонидан 300 дан ортиқ мутахассислардан иборат ишчи гуруҳлар ташкил этилган. Улар томонидан пойтахт ҳудудидаги иссиқхона хўжаликлари, саноат корхоналари, қурилиш материаллари ишлаб чиқариш заводлари ва бошқа йирик ишлаб чиқарувчи ҳамда ижтимоий соҳа объектлари тўлиқ хатловдан ўтказилган.
Назорат тадбирлари натижасида 4 869 объект ўрганилиб, улардан 595 таси иссиқхона хўжаликлари (Тошкент вилоятида 381 та, Тошкент шаҳрида 214 та), 2 265 та ижтимоий соҳа объекти ҳамда 1 998 саноат ва қурилиш материаллари ишлаб чиқариш корхоналари бўлган. Барча объектларда профилактика ва тушунтириш ишлари амалга оширилган.
Ўрганишлар давомида атмосфера ҳавосини муҳофаза қилиш соҳасидаги қонунчилик талабларига риоя этилмаган ҳолатлар аниқланган. Хусусан, айрим хўжаликларда зарарли кимёвий, физик ва биологик таъсир кўрсатувчи моддалар ҳавога чиқарилган. Аниқланган ҳар бир қонунбузилиш ҳолати бўйича кескин чоралар кўрилган, уларнинг олдини олиш ҳамда камайтиришга қаратилган чора-тадбирлар белгиланган.
Жумладан, дудбурондан фойдаланиш қоидаларини бузган 58 иссиқхона хўжалигига нисбатан маъмурий жарима қўлланилган, 106 хўжалик фаолияти вақтинча тўхтатилган. Шунингдек, 387 ҳолат бўйича экологик талабларига мувофиқлаштириш ҳамда плёнка, автошина ва ўсимлик қолдиқларини ёқилғи сифатида фойдаланмаслик юзасидан расмий огоҳлантириш хатлари юборилган.
