Америкалик миллиардер Илон Маскка тегишли SpaceX компанияси Ой ва Марсда шаҳарлар қуришни режалаштирмоқда. Бу ҳақда миллиардернинг ўзи X ижтимоий тармоғида хабар берди.
Маълум қилинишича, яқин ўн йилликларда Ернинг табиий йўлдоши — Ойда аҳоли пункти барпо этилиши режалаштирилган. SpaceX аллақачон Ойда ўзини ўзи ривожлантира оладиган шаҳар қуришга устувор эътибор қаратган. Компания, тахминан, 5–7 йил ичида Марсда шаҳар қурилишини бошламоқчи.
Маскнинг сўзларига кўра, Марсга парвозлар фақат маълум даврларда — ҳар 26 ойда бир марта, сайёралар қулай ҳолатда жойлашганда амалга оширилади. Бундай парвоз, тахминан, олти ой давом этади.
Ойга ракета учириш эса ҳар ўн кунда бир марта амалга оширилиши мумкин, парвоз давомийлиги эса, тахминан, икки суткани ташкил этади. Бу эса Ойда шаҳар қуриш жараёнини тезлаштиради. Маск Марсда тўлиқ шаҳар барпо этиш учун 20 йилдан ортиқ вақт талаб этилишини таъкидлади.
Шу билан бирга, НАСА ҳам сўнгги 50 йил ичида илк бор одамларни Ойга юборишни режалаштирмоқда. “Артемида” дастурининг мақсади — астронавтларни Ойга тушириш ва вақт ўтиши билан у ерда узоқ муддатли иштирокни йўлга қўйишдир. Ушбу дастур доирасидаги иккинчи парвоз бир неча бор қолдирилган бўлиб, тахминларга кўра, у 2026 йил март ойи бошида амалга оширилади.
