АҚШ Президенти Дональд Трамп Қозоғистон раҳбари Қосим-Жомарт Тўқаевга Оқ уйнинг калити ва имзоси туширилган бош кийим совға қилди. Бу ҳақда Тўқаевнинг матбуот котиби Руслан Желдибай хабар берди.
Маълум қилинишича, Оқ уйда Қозоғистон элчиси Магжан Илёсовнинг Трампга ишонч ёрлиқларини топшириш маросими бўлиб ўтган. Кейинчалик Президент ёрдамчиси ва матбуот котиби Руслан Желдибай учрашув натижалари ҳақида ҳисобот берган.
“Қозоғистоннинг янги элчиси Америка Қўшма Штатлари Президенти билан учрашди. Унинг айтишича, ишонч ёрлиқларини топшириш маросимидан кейинги қисқа суҳбат давомида АҚШ Президенти элчи билан шу йилнинг ноябрь ойида Овал кабинетда давлат раҳбари Қосим-Жомарт Тўқаев билан учрашув ҳақидаги таассуротларини ўртоқлашган. Америка етакчиси Қозоғистон Президентига илиқ шахсий тилакларини етказган, унинг ҳурматини таъкидлаган ва уни “халқаро жараёнларни чуқур ва мувозанатли тушунадиган ажойиб инсон ва тажрибали давлат арбоби” деб таърифлаган. Бундан ташқари, АҚШ Президенти Қосим-Жомарт Тўқаевга бир нечта совғалар, жумладан, Оқ уйнинг рамзий калити ва унинг дастхати туширилган кепкани ҳам юборди”, дейилади хабарда.
Бу Тўқаевнинг ноябрь ойида АҚШга қилган сафари бежиз кетмаганини кўрсатади. Қайд этиш жоиз, Тўқаев Америкадан улкан янгиликлар билан қайтди. Трамп ҳам Қозоғистон етакчисига Марказий Осиёнинг бошқа давлатларига қараганда кўпроқ мулозамат қилди. Тўқаев у ерда “Иброҳим келишувлари”га қўшилди ва бу шахсан Оқ уй раҳбари томонидан олқишланди. Шу билан бирга, етакчилар Оқ уйда Исроил Бош вазири Биньямин Нетаньяху билан телефонда гаплашди. Қолаверса, Қозоғистон Президенти Қосим-Жомарт Тўқаев ва АҚШ Президенти Дональд Трамп ўртасида Оқ уйда бўлиб ўтган учрашув давомида 17 миллиард доллардан ортиқ қийматдаги келишувлар имзолангани ва икки мамлакат ўртасидаги кенг қамровли стратегик шериклик янги босқичга кўтарилгани эълон қилинди.
