Бугун, 11 декабрь куни Тошкентдаги “Кўксарой” қароргоҳида Ўзбекистон Президенти Шавкат Мирзиёев ва Парагвай Президенти Сантьяго Пенья ҳузурида Ўзбекистоннинг Жаҳон савдо ташкилотига қўшилиши доирасида бозорга кириш масалалари бўйича икки томонлама музокаралар якунлангани тўғрисидаги баённома имзоланди. Бу ҳақда Президент матбуот хизмати хабар берди.
Маълумки, Ўзбекистон ўтган ойда Жаҳон савдо ташкилотига аъзо бўлиш бўйича яна икки мамлакат – Канада ва Панама билан музокараларни якунлади. Президентнинг ЖСТ бўйича махсус вакили Азизбек Урунов Россия билан музокаралар деярли якунлангани, олдинда фақат Тайвань билан мулоқот қилиш турганини айтганди.
Парагвай Президентининг ташрифига қайтадиган бўлсак, Сантьяго Пеньянинг Ўзбекистонга сафари 11-13 декабрь кунларига мўлжалланган. Унга сафар давомида рафиқаси Летиция Окампос ҳамроҳлик қилмоқда. Парагвай етакчиси, шунингдек, Халқаро автомобиль федерацияси Бош ассамблеясида ва федерация шафелигида ўтказиладиган мусобақалар ғолибларини тақдирлаш маросимида иштирок этади.
Тошкентда бўлиб ўтган музокаралар якунида Ўзбекистон Республикаси Президенти Шавкат Мирзиёев ва Парагвай Республикаси Президенти Сантьяго Пенья Қўшма баёнотни имзолади. Уларнинг ҳузурида Ташқи ишлар вазирликлари ўртасидаги сиёсий маслаҳатлашув механизмини йўлга қўйиш тўғрисида ўзаро англашув меморандумини имзолаш маросими ҳам бўлиб ўтди.
