Жорий йилнинг 27 октябрь куни Ўзбекистон делегациясининг Анқарага амалий ташрифи доирасида Туркия Ички ишлар вазирлигида учрашув бўлиб ўтди. Унда ўзбекистонликлар учун электрон виза жорий этиш масаласи муҳокама қилинган.
Қайд этилишича, учрашувда Туркия Ички ишлар вазири ўринбосари Меҳмет Оқтош икки давлат раҳбарларининг саъй-ҳаракатлари туфайли бугунги кунда Ўзбекистон ва Туркия ўртасида, айниқса, ички ишлар соҳасида яқин алоқалар йўлга қўйилганини таъкидлаган.
Учрашув давомида Туркия томони Ўзбекистон фуқароларига Туркияга бошқа турдаги визалар асосида кирган ҳолда, мамлакатдан чиқмасдан туриб меҳнат рухсатномасини олиш имкониятини тақдим этиш масаласини ўрганиб чиқишини маълум қилган.
Шунингдек, Ўзбекистон фуқаролари учун электрон меҳнат визаларини жорий этиш масаласини кўриб чиқишга тайёрлигини билдирган.
