Мажбурий ижро бюронинг Тошкент шаҳар Олмазор туман бўлими томонидан Фуқаролик ишлари бўйича Шайхонтоҳур туманлараро судининг ижро варақаси асосида «M.S.» МЧЖдан ундирувчи «BRB» АТБ фойдасига жами 7,9 млрд сўм кредит қарздорлигини ундириш бўйича ижро ҳаракатлари амалга оширилмоқда.
Суд қарорига мувофиқ, қарзни қоплаш учун жами 4 та турар жой хонадонлари гаров объекти сифатида ундирувга қаратилган. Ижро жараёнида улардан бири қонунчиликда белгиланган тартибда банк балансига ўтказилиб, яна бир хонадон 1 млрд сўмга сотилиб, ундирувчи банк фойдасига йўналтирилган.
Шунингдек, гаровда бўлган яна 2 та турар жой хонадони Шайхонтоҳур тумани, Навоий кўчасидаги кўп қаватли уйларда жойлашган бўлиб, объектлар ҳам қарздорликни қоплаш мақсадида ундирувга қаратилди. Давлат ижрочилари томонидан хонадонлар қонун талабларига мувофиқ хатланиб, онлайн-аукцион савдоларига қўйилди.
Ўтказилган электрон савдоларда ҳар икки хонадон ҳам сотилди. Сотувдан тушган пул маблағлари белгиланган тартибда Бюронинг Олмазор туман бўлими депозит ҳисоб рақамига келиб тушган ва амалдаги қонунчиликка мувофиқ, банк фойдасига йўналтирилди.
