Жаҳон банки Ўзбекистонга 10,6 млн доллар миқдорида грант ажратишни маъқуллади. Маблағлар эскирган газ узатиш инфратузилмасидаги сизиб чиқиш ҳолатларини камайтириш, уй хўжаликлари ва саноат корхоналарини таъминлаш учун табиий газни тежашга йўналтирилади.
Жаҳон банки хабарига кўра, мазкур чоралар кўрилиши мамлакатда энергетика хавфсизлигини мустаҳкамлаш, давлат даромадларини кўпайтириш ва қўшимча иш ўринларини яратишга хизмат қилади.
Таҳлил қилинишича, Ўзбекистонда газ узатиш инфратузилмаси техник хизмат кўрсатиш ва таъмирлашга етарлича сармоя киритилмагани сабаб вақт ўтиши билан эскирган. Бу эса газ сизиб чиқиши ва молиявий йўқотишларга олиб келади. Зарур ишлар амалга оширилмаса, 2030 йилга бориб умумий газ йўқотишлари ҳажми 1,75 миллиард куб метрга етиши мумкин. Оқибатда йилига газ сотишдан тушиши мумкин бўлган 228 миллион долларлик даромад йўқотилади.
“Газ узатиш тизими самарадорлигини ошириш газ йўқотишларини камайтиришга ва шунинг ортидан мамлакатда ишлаб чиқарилган ҳамда Ўзбекистон аҳолиси ва бизнеси учун арзон энергия ҳажми кўпроқ бўлишини таъминлайди. Тармоқлардаги газ сизиб чиқишларини камайтириш қўшимча ресурсларни тежашга хизмат қилади ва сезиларли иқтисодий фойда келтиради”, дея таъкидлаган Жаҳон банкининг Марказий Осиё бўйича минтақавий директори Нажи Бенхасин.
“Ўзбекистонда газ сизиб чиқишини бартараф этиш механизмини яратиш” лойиҳаси 2029 йилгача амалга оширилади. Таъмирлаш ишлари орқали истеъмолчилар ва тадбиркорлик субъектларига етказиб бериладиган 47,5 минг тонна газ сизиб чиқишининг олдини олиш режалаштирилган.
Газ йўқотишларининг камайиши тахминан 18 миллион доллар миқдорида маблағлар тежалишини таъминлайди. Ушбу маблағларнинг катта қисми сизиб чиқишни аниқлаш ва бартараф этиш бўйича узоқ муддатли чора-тадбирларни амалга оширишга йўналтирилади. Улар “Ўзтрансгаз” АЖ газ узатиш тизимининг самарали ва ишончли фаолият юритишини таъминлаш имконини беради, дея маълум қилган халқаро молия институти.
Лойиҳа газ сизиб чиқишини аниқлаш ва бартараф этиш самарадорлигини ошириш учун “Ўзтрансгаз” АЖга замонавий ускуналар сотиб олиш ва ходимларни ўқитишга сармоя киритишни ҳам назарда тутади. Шунингдек, “Ўзтрансгаз” АЖга табиий газнинг асосий компоненти бўлган метан эмиссияси бўйича ҳисобот ва ўлчашнинг халқаро стандартларини жорий этишда кўмаклашилади.
