Нотариусликка талабгорлар учун ягона танлов ўтказиш тартиби тўғрисидаги низомни давлат рўйхатидан ўтказилди.
Қайд этилишича, танлов Адлия вазирлиги ҳузуридаги Олий малака комиссияси ҳамда Билим ва малакаларни баҳолаш агентлиги томонидан нотариус лавозими бўш бўлган ёки янги нотариус лавозими таъсис этилганда ўтказилади.
Танлов тест синовлари ва амалий имтиҳон шаклида, 2 босқичда бўлиб ўтади. Бу ҳақдаги эълон “Инсон ва қонун” газетаси ва вазирликнинг расмий веб-сайтига жойлаштирилади.
Ягона танловнинг биринчи босқичи Адлия вазирлиги томонидан талабгорларнинг рўйхати агентликка тақдим этилган кундан бошлаб 10 кундан сўнг, бироқ 15 кундан кечиктирмай ўтказилади.
Талабгорларга электрон платформа орқали давлат ва жамият бошқаруви, коррупцияга қарши курашиш, фуқаролик ҳуқуқи, нотариат ва ворислик ҳуқуқи бўйича 40 та тестни ишлаш учун 60 дақиқа берилади.
Тест синовида 55 баллдан юқори тўплаган талабгор муваффақиятли ҳисобланади ва амалий имтиҳондан ўтолмаган тақдирда ҳам 1 йил давомида ундан тест синовини қайта топшириш талаб этилмайди.
Иккинчи босқичда талабгорлар электрон платформада нотариал ҳаракатлар лойиҳаларини тайёрлаш ва муаммоли масалага (казусга) жавоб бериш бўйича синалади. Бунда тайёрланишга 20 дақиқа вақт ажратилади.
Ушбу босқич натижаси бўйича талабгор тўпланган балл энг юқори баллнинг 55 фоизидан юқори бўлганда ягона танловдан ўтган ҳисобланади.
Ушбу тартиб 2026 йил 1 апрелдан эътиборан кучга киради.
