Беларуснинг шимоли-ғарбий қисмида жойлашган Веселуха қишлоғи сотувга қўйилди. Бу ҳақда бугун, 25 февраль куни “Минска Правда” нашри хабар берди.
Қайд этилишича, қишлоқнинг нархи 30 минг Беларусь рубли этиб белгиланган. Бу тахминан бир хонали квартира нархига тенг.
Веселуха Постави шаҳридан 5 километр, Литва чегарасидан эса 20 километр узоқликда жойлашган. Қишлоқ жуда кичик бўлиб, атиги учта уйдан иборат. Шунга қарамай, у алоҳида маъмурий бирлик сифатида рўйхатга олинган. Энг яқин аҳоли пункти – 55 киши яшайдиган Савичи қишлоғи бўлиб, у 1 километр масофада жойлашган.
Ҳудудда қудуқ ва электр таъминоти мавжуд. Уйлар печка билан иситилади, канализация тизими эса йўқ. Қишлоқ ўрмон ва сув ҳавзалари яқинида жойлашган бўлиб, тинч ва шовқинсиз муҳитга эга. Тураржойлардан ташқари, ҳудудда қўшимча хўжалик бинолари ва гараж ҳам бор.
Маълум қилинишича, аввал барча уйлар бир шахс томонидан сотиб олинган. У бу жойни агротуризм масканига айлантиришни режалаштирган, бироқ лойиҳа амалга ошмаган. Шундан сўнг мулк тўлиқ сотувга чиқарилган.
