Тошкент вилояти ва шаҳридаги экорейдда бир кунда 110 та объект фаолияти тўхтатилди. Бу ҳақда Экология қўмитаси хабар берди.
24 декабрь ҳолатига кўра, Давлат экологик назорат инспекцияси (Экополиция), Бош прокуратура, Фавқулодда вазиятлар вазирлиги, Миллий гвардия ва Ички ишлар вазирлиги ходимларидан иборат Махсус комиссия томонидан Тошкент шаҳри ҳудудида ҳамда Тошкент вилоятининг Қибрай, Зангиота, Юқори Чирчиқ, Янгийўл ва Тошкент туманларида рейд тадбирлари ўтказилди.
Олиб борилган рейд тадбирлари давомида атмосфера ҳавосини муҳофаза қилиш соҳасидаги қонунчиликка риоя этилиши юзасидан 3 707 та объект текширилди. 25 ноябрдан 24 декабргача бўлган даврда ўтказилган текширувлар якунлари бўйича қуйидагилар аниқланди:
- 1 128 та ҳуқуқбузарлик ҳолати аниқланиб, улар бўйича маъмурий ҳужжатлар расмийлаштирилди;
- атроф-муҳитга салбий таъсир кўрсатган 110 та объектнинг (шундан 99 таси Тошкент вилоятида ва 11 таси Тошкент шаҳрида) фаолияти 10 иш кунигача бўлган муддатга вақтинча тўхтатилди;
- 94 та иссиқхона объектида чанг-газ тозалаш ускуналари (филтрлар) ўрнатилди;
- 6 та иссиқхона объекти газ тармоқларига уланди, яна 7 та объект газлаштириш учун техник шартлар олишга ариза топширди.
Маълумот ўрнида, 23 декабрь куни ўтказилган рейд тадбирлари давомида 8 та ҳуқуқбузарлик ҳолати аниқланган. Шунингдек, назорат тадбирларининг очиқлигини таъминлаш, аҳолининг экологик маданиятини ошириш ҳамда атмосфера ҳавосини муҳофаза қилишга доир қонунчилик талабларини кенг жамоатчиликка етказиш мақсадида оммавий ахборот воситалари иштирокида махсус видеоматериаллар тайёрланиб, тарқатилди.
